20రోజుల్లో కిరణ్ సర్కార్ కూలుతుంది:జగన్ నేత జూపూడి

By Srinivas

Published: Monday, October 31, 2011, 10:53 [IST]

రాజమండ్రి/గుంటూరు: మరో ఇరవై రోజుల్లో ముఖ్యమంత్రి కిరణ్ కుమార్ రెడ్డి సర్కారు కూలిపోవడం ఖాయమని వైయస్సార్ కాంగ్రెసు పార్టీ నేత, శాసనమండలి సభ్యుడు జూపూడి ప్రభాకర్ రావు సోమవారం రాజమండ్రిలో అన్నారు. ముప్పై నాలుగు మంది శాసనసభ్యులు రాజీనామా చేయటంతో కిరణ్ సర్కారు మైనార్టీలో పడిపోయిందన్నారు. త్వరలో రాష్ట్రపతి పాలన వచ్చే అవకాశముందన్నారు. వచ్చే ఎన్నికల్లో వైయస్సార్ కాంగ్రెసు పార్టీ గెలుపు ఖాయమన్నారు. ప్రతిపక్ష టిడిపి అధినేత నారా చంద్రబాబు నాయుడు ప్రభుత్వంపై అవిశ్వాసం పెట్టడానికి వెనుకాడుతున్నారని విమర్శించారు.

తెలంగాణ ప్రజల శాపం వల్లే రాష్ట్ర ప్రభుత్వం మైనార్టీలో పడిపోయిందని భారతీయ జనతా పార్టీ సీనియర్ నేత, మాజీ రాష్ట్ర అధ్యక్షుడు బండారు దత్తాత్రేయ గుంటూరు జిల్లాలో అన్నారు. ప్రభుత్వం ఏ సమయంలోనైనా పడిపోయే అవకాశముందన్నారు. ఎన్డీయే హయాంలో టిడిపి ఎన్నడూ తెలంగాణ అడగలేదన్నారు. పరిపాలనా సౌలభ్యం కోసం దివంగత ఎన్టీఆర్ జిల్లాలను, చిన్న మండలాలను ఏర్పాటు చేశారని అదే తరహా చిన్న రాష్ట్రాలు ఏర్పాటు చేయాలన్నారు. తెలంగాణ విడిపోతే ప్రాంతాలే తప్ప తెలుగు వారు కాదన్నారు. ఉద్యమం పేరుతో సెటిలర్లపై దాడులు చేయడం సరికాదన్నారు.

Published On October 31, 2011