జయసుధ మెడలో గులాబీ కండువా, నిలదీసిన ప్రజలు

By Srinivas

Published: Tuesday, November 1, 2011, 15:41 [IST]

హైదరాబాద్: రూ.1కే కిలో బియ్యం పథకం విషయంలో సికింద్రాబాద్ కాంగ్రెసు పార్టీ శాసనసభ్యురాలు జయసుధను నియోజకవర్గం ప్రజలు మంగళవారం నిలదీశారు. ముఖ్యమంత్రి కిరణ్ కుమార్ రెడ్డి ఉదయం రూ.1కి కిలో బియ్యం పథకాన్ని ప్రతిష్టాత్మకంగా ప్రవేశ పెట్టిన విషయం తెలిసిందే. ఇందులో భాగంగా స్థానిక ఎమ్మెల్యే జయసుధ పద్మారావు నగర్‌కు వెళ్లారు. అక్కడ బియ్యం తీసుకున్న స్థానికులు జయసుధను నిలదీశారు. ఒక్క రూపాయికే కిలో బియ్యం అంటూ పురుగులు పట్టిన బియ్యం ఇవ్వడమేమిటంటూ ప్రశ్నించారు.

జయసుధ కూడా వారితో ఏకీభవించారు. ప్రభుత్వం నిరుపేదలకు రూపాయికే కిలో బియ్యం ఇవ్వడం సంతోషమేనన్నారు. అయితే బియ్యం నాణ్యమైనవి పంపిణీ చేస్తే బాగుంటుందని అభిప్రాయపడ్డారు. ధర ఏదైనా నాణ్యత మాత్రం తగ్గవద్దన్నారు. కాగా అదే సమయంలో పలువురు తెలంగాణవాదులు ఆమె మెడలో తెలంగాణ రాష్ట్ర సమితి కండువాను కప్పారు. జయసుధ తెలంగాణ కోసం మొదటిసారి రాజీనామా చేసినప్పటికీ రెండోసారి కొండా సురేఖ, కుంజా సత్యవతి రాజీనామా చేసినప్పుడు చేయలేదు.

Published On November 1, 2011