పురంధేశ్వరి పిఎ సంతకం ఫోర్జరీ, చిక్కుల్లో యుపిఎ

By Pratap

Published: Wednesday, November 2, 2011, 16:44 [IST]

న్యూఢిల్లీ: కేంద్ర మానవ వనరుల శాఖ సహాయ మంత్రి దగ్గుబాటి పురంధేశ్వరి పర్సనల్ అసిస్టెంట్ సంతకాన్ని గుర్తు తెలియని వ్యక్తులు ఫోర్జరీ చేశారు. ఉత్తరప్రదేశ్‌లోని ఓ విద్యాసంస్థకు గ్రాంట్ మంజూరు కోసం ఈ సంతకం ఫోర్జరీ జరిగినట్లు తెలుస్తోంది. దీంతో కేంద్రంలోని యుపిఎ ప్రభుత్వం మరో వివాదంలో చిక్కుకుంది. ఫోర్జరీ వ్యవహారంలో లోపలివాళ్ల పాత్ర ఉండవచ్చుననే కోణం నుంచి పోలీసులు దర్యాప్తు సాగిస్తున్నారు. ఢిల్లీ పోలీసు నేర నిరోధక సంస్థ ఆర్థిక నేరాల విభాగంలో ఇందుకు సంబంధించి కేసు నమోదైంది. మానవ వనరుల అభివృద్ధి శాఖ చీఫ్ విజిలెన్స్ ఆఫీసర్, సంయుక్త కార్యదర్శి అమిత్ ఖేర్ ఆగస్టులో చేసిన ఫిర్యాదు మేరకు ఈ కేసు నమోదైంది.

మంత్రిత్వ శాఖ లెటర్ హెడ్‌పై మంత్రి తొలి పర్సనల్ అసిస్టెంట్ మండల కనకాజీ సంతకం ఫోర్జరీ జరిగింది. లెటర్ హెడ్‌పై బయటవాళ్లు ఎలా సంతకం ఫోర్జరీ చేస్తారనే విషయాన్ని ఫిర్యాదులో పేర్కొన్నారు. అది లోపలివాళ్ల పాత్ర లేకుండా జరిగి ఉండదని పోలీసు అధికారులు అంటున్నారు. ప్రింటైన అధికారిక లెటర్ హెడ్‌పై సంతకం ఫోర్జరీ జరిగిందని, మంత్రి కార్యాలయం నుంచి దాన్ని జారీ చేశారని, దానికి సంబంధించి తగిన డైరీ నెంబర్, సీల్ పాయింట్స్ ఉన్నాయని అధికారులు అంటున్నారు.

లేఖ హిందీలో టైప్ చేసి ఉంది. అయితే, మంత్రి కార్యాలయం నుంచి హిందీలో టైప్ చేసే సంప్రదాయం లేదని, అధికారిక పనులేవీ హిందీ భాషలో జరగవని కనకాజీ పోలీసులకు చెప్పారు. మంత్రి కార్యాలయంలోనివారెవరో దీనికి పాల్పడి ఉంటారని కనకాజీ అనుమానం వ్యక్తం చేశారు. తాను గ్రాంట్లు లేదా చెల్లింపులు జరపాలని అధికారికంగా ఎవరికీ చెప్పలేదని ఆయన వివరించారు.

Published On November 2, 2011