చంద్రబాబుకూ సిబిఐ విచారణ తప్పదా?

By Pratap

Published: Friday, November 4, 2011, 10:43 [IST]

హైదరాబాద్: ఎమ్మార్ ప్రాపర్టీస్ కేసులో తెలుగుదేశం పార్టీ అధ్యక్షుడు నారా చంద్రబాబు నాయుడిని కూడా సిబిఐ విచారించే అవకాశాలున్నట్లు ఓ ప్రముఖ ఆంగ్ల దినపత్రిక రాసింది. ఈ కేసులో స్టైలిష్ హోమ్స్ మేనేజింగ్ డైరెక్టర్ కోనేరు ప్రసాద్‌ను సిబిఐ గురువారం అరెస్టు చేసిన విషయం తెలిసిందే. ఈ కేసులో చంద్రబాబుకు సిబిఐ సమన్లు జారీ చేస్తుందని ఆ పత్రిక రాసింది. కోనేరు ప్రసాద్‌తో చంద్రబాబుకు సన్నిహిత సంబంధాలున్నాయని, చంద్రబాబు హయాంలోనే ఎమ్మార్ ప్రాపర్టీస్ ఒప్పందం జరిగిందని అంటున్నారు. దాంతో చంద్రబాబును సిబిఐ అధికారులు ప్రశ్నించే అవకాశాలున్నట్లు చెబుతున్నారు.

మణికొండలోని ఎమ్మార్ టౌన్‌షిప్‌లోని విల్లాలు, విల్లాల ప్టాట్లు, అపార్టుమెంట్ల అమ్మకాల్లో ఎపిఐఐసికి 4,310 కోట్ల రూపాయల నష్టం వాటిల్లింది. మనీ లాండరింగ్, ఫ్లైట్ ఆఫ్ క్యాపిటల్, పన్ను ఎగవేత, ప్రభుత్వాన్ని మోసం చేసే ఉద్దేశం వంటి అక్రమాలు జరిగినట్లు సిబిఐ ఓ అంచనాకు వచ్చినట్లు చెబుతున్నారు. వైయస్ జగన్ సంస్థలకు నల్లధనం ఏదైనా ప్రవహించిందా అనే కోణంలో కూడా సిబిఐ అధికారులు దర్యాప్తు చేస్తున్నట్లు తెలుస్తోంది.

ఎమ్మార్ ప్రాపర్టీస్‌లో జగన్ బినామీల పేరు మీద, ఆయన భార్య భారతిరెడ్డి పేరు మీద, కెవిపి రామచందర్ రావు బంధువు కె. రఘు పేరు మీద విల్లాలు ఉన్నట్లు తెలుస్తోంది. ఎమ్మార్ కేసులో ఎపిఐఐసి మేనేజింగ్ డైరెక్టర్‌గా పనిచేసిన బిపి ఆచార్యను మొదట ప్రథమ ముద్దాయిగా చేర్చారు.

Published On November 4, 2011