వైయస్ జగన్‌పై తెలుగుదేశం నేతల ఎదురుదాడి

By Pratap

Published: Friday, November 4, 2011, 18:32 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డికి చెందిన ఓబుళాపురం మైనింగ్ కంపెనీ (ఒఎంసి) కుంభకోణం కేసులో వైయస్సార్ కాంగ్రెసు పార్టీ అధ్యక్షుడు వైయస్ జగన్ చేసిన ప్రకటన తెలుగుదేశం పార్టీ అధ్యక్షుడు నారా చంద్రబాబు నాయుడు ఆత్మరక్షణలో పడినట్లే కనిపిస్తున్నారు. ఒఎంసికి భూములు అప్పగించింది చంద్రబాబు నాయుడి ప్రభుత్వమేనని, ఈ కేసులో చంద్రబాబును విచారించాలని జగన్ అన్నారు. దీంతో తెలుగుదేశం పార్టీ చిక్కుల్లో పడినట్లు కనిపిస్తోంది. అందుకే వైయస్ జగన్‌పై తెలుగుదేశం పార్టీ నాయకులు ఎదురు దాడికి దిగారు. సిబిఐ ముందు తన వాంగ్మూలం ఇచ్చిన తర్వాత జగన్ మాట్లాడిన కొద్దిసేపటికే తెలుగుదేశం నాయకులు ప్రతి విమర్శలకు దిగారు. తెలుగదేశం శానససభ్యుడు మోత్కుపల్లి నర్సింహులు జగన్‌పై తీవ్రమైన వ్యాఖ్యలు చేశారు. అక్కుసుతోనే జగన్ తమ పార్టీ అధ్యక్షుడు చంద్రబాబుపై విమర్శలు చేశారని ఆయన అన్నారు. గాలి జనార్దన్ రెడ్డితో జగన్‌కు సన్నిహిత సంబంధాలున్నాయని ఆయన అన్నారు. జగన్ జైలులో గాలి జనార్దన్ రెడ్డి సరసన చేరడం ఖాయమని ఆయన అన్నారు.

వైయస్ జగన్‌పై తెలుగుదేశం సీనియర్ నాయకులు ఎర్రంనాయుడు, నామా నాగేశ్వరరావు కూడా విరుచుకుపడ్డారు. ఒఎంసి లీజు 2004లోనే ముగిసిందని, దాన్ని వైయస్ రాజశేఖర రెడ్డి ప్రభుత్వమే పునరుద్ధరించిందని ఎర్రంనాయుడు అన్నారు. చంద్రబాబు నాయుడిని అనవసరంగా జగన్ రొచ్చులోకి లాగుతున్నారని ఆయన అన్నారు. తనను సాక్షిగానే సిబిఐ పిలిచిందని జగన్ సెల్ఫ్ డిక్లరేషన్ఇచ్చుకుంటే సరిపోదని ఆయన అన్నారు. ఒఎంసి అక్రమాలకు బాధ్యుడు వైయస్ జగనే అని తెలుగదేశం పార్లమెంటు సభ్యుడు నామా నాగేశ్వర రావు అన్నారు. కాంగ్రెసు ప్రభుత్వ హయాంలోనే ఎమ్మార్ కుంభకోణం జరిగిందని ఆయన అన్నారు. కోనేరు ప్రసాద్ సోదరుడు కోనేరు రవీంద్రనాథ్‌కు చెందిన భవనంలోనే వైయస్సార్ కాంగ్రెసు పార్టీ కార్యాలయం ఉండడం అందుకు సాక్ష్యమని ఆయన అన్నారు. కోనేరు ప్రసాద్ వైయస్సార్ ప్రభుత్వ హయాంలోనే స్టైలిష్ హోమ్‌ను స్థాపించాడని ఆయన చెప్పారు. చంద్రబాబు వైయస్ జగన్ కలలోకి వస్తున్నాడని ఆయన అన్నారు.

మరో తెలుగుదేశం నేత దాడి వీరభద్రరావు కూడా జగన్‌పై తీవ్ర ఆరోపణలు చేశారు. గాలి జనార్దన్ రెడ్డికి, చంద్రబాబుకు ఏ విధమైన సంబంధం లేదని ఆయన అన్నారు. ఆర్ఆర్ గోల్డ్, రెడ్ గోల్డ్ నుంచి సాక్షిలోకి పెట్టుబడులు ఎలా వచ్చాయే జగన్ చెప్పాలని ఆయన విశాఖపట్నంలో డిమాండ్ చేశారు.

Published On November 4, 2011