లేకుంటే బాబును సమైక్యవాదిగా గుర్తిస్తాం: కోదండరామ్

By Pratap

Published: Tuesday, November 15, 2011, 17:23 [IST]

హైదరాబాద్: తెలంగాణపై ప్రధాని డాక్టర్ మన్మోహన్ సింగ్ చేసిన ప్రకటనపై స్పందించకపోతే తెలుగుదేశం పార్టీ అధ్యక్షుడు నారా చంద్రబాబునాయుడిని సమైక్యవాదిగానే గుర్తిస్తామని తెలంగాణ రాజకీయ జెఎసి చైర్మన్ ప్రొఫెసర్ కోదండరామ్ అన్నారు. తెలంగాణపై ప్రధాని చేసిన ప్రకటనపై స్పందించాలని ఆయన చంద్రబాబును డిమాండ్ చేశారు. కాంగ్రెసుతో చంద్రబాబు కుమ్మక్కయి తెలంగాణను అడ్డుకుంటున్నారని ఆయన మంగళవారం మీడియా ప్రతినిధులతో అన్నారు. తెలంగాణ రాష్ట్ర సాధన కోసం తమ ఉద్యమాన్ని మరింత ఉధృతం చేస్తామని ఆయన చెప్పారు.

ఉత్తరప్రదేశ్‌ను నాలుగు రాష్ట్రాలుగా విభజించాలనే ఆ రాష్ట్ర ముఖ్యమంత్రి మాయావతి ప్రకటనను స్వాగతిస్తున్నట్లు ఆయన తెలిపారు. మాయావతిని చూసి ముఖ్యమంత్రి కిరణ్ కుమార్ రెడ్డి బుద్ధి తెచ్చుకోవాలని ఆయన వ్యాఖ్యానించారు. తెలంగాణ రాష్ట్ర ఏర్పాటుకు ముఖ్యమంత్రి శాసనసభలో తీర్మానం ప్రతిపాదించాలని, దానికి చంద్రబాబు మద్దతు చెప్పాలని ఆయన డిమాండ్ చేశారు. తెలంగాణ పార్లమెంటు సభ్యుల రాజీనామాలను స్పీకర్ తిరస్కరించడం సరైంది కాదని, దానిపై పార్లమెంటు సభ్యులు పార్లమెంటులో పోరాడాలని ఆయన అన్నారు.

Published On November 15, 2011