బాబు సహకరించాలి, సిఎం నేర్చుకోవాలి: కోదండరామ్

వరంగల్/కరీంనగర్: ముఖ్యమంత్రి కిరణ్ కుమార్ రెడ్డి ఉత్తర ప్రదేశ్ ముఖ్యమంత్రి మాయావతిని ఆదర్శంగా తీసుకొని అసెంబ్లీలో తీర్మానం ప్రవేశ పెట్టాలని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ బుధవారం సూచించారు. ఆయన వరంగల్ జిల్లాలో తెలంగాణ సాధనా యాత్రను ప్రారంభించారు. ఈ సందర్భంగా ఆయన మాట్లాడారు. సిఎం తెలంగాణ కోసం అసెంబ్లీలో తీర్మానం ప్రవేశ పెట్టాలని తెలుగుదేశం పార్టీ అధినేత నారా చంద్రబాబు నాయుడు అందుకు సహకరించాలని విజ్ఞప్తి చేశారు. అసెంబ్లీ సమావేశ తేదీలు ప్రకటించాక భవిష్యత్తు కార్యాచరణ ప్రకటిస్తామని చెప్పారు.

కాంగ్రెసు పార్టీ తెలంగాణపై కమిటీ, కమీషన్ల పేరుతో కాలాయాపన చేస్తోందని తెలంగాణ రాష్ట్ర సమితి శాసనసభ్యుడు హరీష్ రావు సిద్దిపేటలో యాత్ర ప్రారంభం సందర్భంగా అన్నారు. పాదయాత్ర ద్వారా కాంగ్రెసు వైఖరిని ఎండగడతామని చెప్పారు. తనపై స్థానిక పోలీసు అధికారులు పిడి యాక్టు క్రింద కేసు పెట్టేందుకు ప్రయత్నాలు చేస్తున్నారన్నారు. జిల్లాలో ముగ్గురు మంత్రులు, ఎనిమిది మంది శాసనసభ్యులు ఉన్నా చేసిందేమీ లేదన్నారు.

జిల్లాను కరువు జిల్లాగా ప్రకటించాలని డిమాండ్ చేశారు. పరిశ్రమల వల్ల కాలుష్యం తప్ప ఉద్యోగాలు దక్కడం లేదని ఆయన ఆవేదన వ్యక్తం చేశారు. కరీంనగర్ జిల్లాలో టిఆర్ఎస్ఎల్పీ ఈటెల రాజేందర్, స్థానిక ఎమ్మెల్యేలు, ఎమ్మెల్సీలు ఆంజనేయస్వామి దేవాలయంలో పూజలు నిర్వహించి పాదయాత్ర ప్రారంభించారు.

English summary

TJAC chairman Kodandaram appealed TDP chief Nara Chandrababu Naidu to support resolution in assembly. He demanded CM Kiran Kumar Reddy to learn from UP CM Mayawati.