నేను పార్టీ పెట్టలేదు, ఆలోచన కూడా లేదు: బాపూజీ

హైదరాబాద్: తెలంగాణ కోసం తాను పార్టీని స్థాపించలేదని స్వాతంత్ర్య సమరయోధుడు కొండా లక్ష్మణ్ బాపూజీ చెప్పారు. తాను పార్టీ పెట్టినట్లు వచ్చిన వార్తలను ఆయన ఖండించారు. తనకు పార్టీ పెట్టే ఆలోచన కూడా లేదని ఆయన బుధవారం మీడియా ప్రతినిధులతో అన్నారు. తాను పార్టీ పెట్టినట్లు వచ్చిన వార్తల్లో నిజం లేదని ఆయన అన్నారు. స్వాతంత్ర్య సమరయోధుడిగానే తాను తెలంగాణ కోసం పోరాటం చేస్తానని ఆయన చెప్పారు.

తెలంగాణ పార్లమెంటు సభ్యుల రాజీనామాలను లోకసభ స్పీకర్ మీరా కుమార్ తిరస్కరించడం మంచి పరిణామమని కాంగ్రెసు తెలంగాణ ప్రాంత పార్లమెంటు సభ్యుడు సర్వే సత్యనారాయణ అన్నారు. రాజీనామాల వల్ల తెలంగాణ రాదని ఆయన బుధవారం విడిగా మీడియా ప్రతినిధులతో అన్నారు. తెలంగాణపై పార్టీ అధిష్టానం తీసుకునే నిర్ణయానికి పార్టీ నాయకులంతా కట్టుబడి ఉండాలని ఆయన అన్నారు.

తాను స్పీకర్ మీరాకుమార్‌ను రేపు పదకొండున్నర గంటలకు కలుస్తానని ఆయన అన్నారు. పార్లమెంటు సభ్యులందరితో కలిసే తాను రాజీనామా చేశానని, తన రాజీనామాను పెండింగులో ఎందుకు పెట్టారో తెలియదని, ఆ విషయం స్పీకర‌ును కలిసి అడుగుతానని ఆయన చెప్పారు. తెలంగాణ కోసం పార్లమెంటు సభ్యులమంతా కలిసే పోరాడుతామని ఆయన అన్నారు. తెలంగాణపై అనుసరించాల్సిన వ్వూహంపై కాంగ్రెసు తెలంగాణ ప్రాంత పార్లమెంటు సభ్యులు సమావేశమై బుధవారం చర్చించారు. పార్లమెంటుకు హాజరు కావాలని నిర్ణయించుకున్నారు. మరోసారి ఈ నెల 21వ తేదీన భేటీ కావాలని నిర్ణయించుకున్నారు.

English summary

Freedom fighter Konda Laxman Bapuji clarified that he has not launced any political party.