గాలి జనార్ధన్‌రెడ్డి ఓఎంసి కేసులో ఐఏఎస్ శ్రీలక్ష్మి అరెస్టు

హైదరాబాద్: కర్నాటక మాజీ మంత్రి గాలి జనార్ధన్ రెడ్డికి చెందిన ఓబుళాపురం మైనింగ్ కంపెనీ కేసులో ఐఏఎస్ అధికారిణి శ్రీలక్ష్మిని సిబిఐ అధికారులు సోమవారం అరెస్టు చేశారు. గనుల కేసు విషయంలో శ్రీలక్ష్మి గాలి జనార్ధన్ రెడ్డికి ఫేవర్‌గా పలు నిర్ణయాలు తీసుకున్నారనే ఆరోపణలు ఉన్న విషయం తెలిసిందే. ఓఎంసి కేసులో వచ్చే నెల చార్జీషీట్ దాఖలు చేయాల్సిన తరుణంలో సిబిఐ అధికారులు సోమవారం ఆమె కార్యాలయానికి వెళ్లి అదుపులోకి తీసుకున్నారు. ఆమెను ఇవాళ లేదా రేపు కోర్టులో హాజరుపర్చే అవకాశాలు ఉన్నాయి. కాగా ఓఎంసి కేసులో శ్రీలక్ష్మిది నాలుగో అరెస్టు. అరెస్టు చేసిన శ్రీలక్ష్మిని సిబిఐ అధికారులు మెట్రోపాలిటన్ మెజిస్ట్రేట్ ముందు హాజరు పరిచారు. రేపు నాంపల్లిలోని సిబిఐ ప్రత్యేక కోర్టు ముందు శ్రీలక్ష్మిని హాజరు పరచాలని మెట్రోపాలిటన్ కోర్టు ఆదేశించింది. అప్పటి వరకు శ్రీలక్ష్మి సిబిఐ కస్టడీలో ఉంటారని చెప్పింది.

ఓఎంసి కేసులో ఆమె ఎ-3 నిందితురాలిగా ఉన్నారు. దివంగత ముఖ్యమంత్రి వైయస్ రాజశేఖర రెడ్డి హయాంలో శ్రీలక్ష్మి పరిశ్రమలు, వాణిజ్యశాఖ కార్యదర్శిగా పని చేశారు. ప్రభుత్వ నిబంధనలు ఉల్లంఘించి, ఓఎంసి కంటే ముందు వేరే కంపెనీలు గనుల కోసం దరఖాస్తు చేసుకున్నప్పటికీ వాటిని పక్కకు పెట్టి గాలికి ఏకపక్షంగా 68.5 హెక్టార్ల గనులు కేటాయించారని శ్రీలక్ష్మిపై ఆరోపణలు ఉన్నాయి. 2009లో ఎలాంటి సమీక్షలు లేకుండానే కొన్ని లీజులు మంజూరు చేశారనే ఆరోపణలూ ఉన్నాయి. వైయస్ హయాంలో గనుల కేటాయింపుల్లో ఈమెది ప్రధాన పాత్ర అని అభియోగాలు ఉన్నాయి.

English summary

IAS officer Srilaxmi arrested in Gali case