రామోజీరావుకు ఏడేళ్ల జైలు శిక్ష పడాలి!: ఎంపీ ఉండవల్లి

By Srinivas

Published: Tuesday, November 29, 2011, 14:17 [IST]

న్యూఢిల్లీ: ఈనాడు సంస్థల అధినేత రామోజీ రావుపై రాజమండ్రి పార్లమెంటు సభ్యుడు ఉండవల్లి అరుణ్ కుమార్ మంగళవారం తీవ్రస్థాయిలో ధ్వజమెత్తారు. రామోజీ తప్పుడు పిటిషన్ల ద్వారా కోర్టును తప్పుదోవ పట్టించాలని ప్రయత్నిస్తున్నారని విమర్శించారు. తప్పుడు పిటిషన్లు వేసిన వారికి ఏడేళ్ల జైలు శిక్ష వేయవచ్చునని, రామోజీ అందుకు అర్హుడన్నారు. రామోజీకి, మార్గదర్శికి సంబంధం లేదని సంస్థ జిఎం పిటిషన్ వేశారని ఇది చాలా ఆశ్చర్యకరమన్నారు. ఉద్దేశ్య పూర్వకంగానే కోర్టును తప్పుదోవ పట్టిస్తున్నారని ఆరోపించారు.

రామోజీని ప్రాసిక్యూట్ చేయాలని తాను హైకోర్టులో అఫిడవిట్ దాఖలు చేస్తానన్నారు. ఆయన కేసులో తన వాదన వినిపించేందుకు ఇంప్లీడ్ చేయాలని గతంలో సుప్రీం కోర్టును కోరానని ఇప్పుడు హైకోర్టును ఆశ్రయించానన్నారు. రామోజీపై నాలుగు రిట్ పిటిషన్లు దాఖలు చేస్తానని చెప్పారు. చంద్రబాబు హయాంలో మార్గదర్శి షేర్ విపరీతంగా పెరిగిందని విమర్శించారు. కో ఆపరేటివ్ బ్యాంకులను మూసివేయించారని ఆరోపించారు. నాపై పరువు నష్టం దావా వేయాలని చూసి రామోజీ సెల్ఫ్ గోల్ చేసుకున్నారన్నారు.

Published On November 29, 2011