జనవరి బాగుంది, ఈద్ అనలేదు: తెలంగాణపై చిదంబరం

By Srinivas

Published: Wednesday, November 30, 2011, 16:27 [IST]

న్యూఢిల్లీ: బక్రీద్ తర్వాత తెలంగాణపై నిర్ణయం ప్రకటిస్తామని తాను ఎప్పుడూ చెప్పలేదని కేంద్ర హోంశాఖ మంత్రి చిదంబరం బుధవారం న్యూఢిల్లీలో మీడియా సమావేశంలో చెప్పారు. ప్రత్యేక రాష్ట్రం అంశంపై కాంగ్రెసుతో సహా ముఖ్యమైన నాలుగు రాజకీయ పార్టీలు ఓ నిర్ణయానికి వస్తే డిసెంబరులో అఖిలపక్ష సమావేశం ఏర్పాటు చేస్తామని చెప్పారు. డిసెంబరు చివరలోగా తెలంగాణపై పురోగతి ఉంటుందని ఆయన అభిప్రాయపడ్డారు. నాలుగు పార్టీలు ఓ నిర్ణయానికి వస్తే డిసెంబర్ లేదా జనవరిలో అఖిలపక్ష సమావేశం ఉంటుందన్నారు. అఖిలపక్ష సమావేశానికి జనవరి నెలే బాగున్నట్టుందని ఆయన అన్నారు. కాగా గతంలోనూ జనవరిలో అఖిలపక్ష సమావేశం జరిగిన విషయం తెలిసిందే.

కిషన్‌జీది బూటకపు ఎన్‌కౌంటర్ కాదని ఆయన ఈ సందర్భంగా తెలిపారు. మావోయిస్టులు ఆయుధాలు వీడి చర్చలకు రావాలని పిలుపునిచ్చారు. ఆయుధాలు వీడితే 72 గంటల్లో చర్చలకు సిద్ధమన్నారు. హింసకు ఏ పరిస్థితుల్లోనూ కేంద్రం తలొగ్గదన్నారు. మావోయిస్టుల హింస ఇంకా కొనసాగుతోందని ఈ నెలలో వారి దాడిలో ముగ్గురు జవాన్లు, 27మంది పౌరులు మృత్యువాత పడ్డారన్నారు. ఎన్‌కౌంటర్లను కేంద్రం ప్రోత్సహించదన్నారు. రాజకీయ సమస్యల పరిష్కారానికి ఆయుధాలు పట్టడం సరికాదన్నారు.

Published On November 30, 2011