కేబినెట్ మాటేమిటి?: విజయమ్మకు పయ్యావుల ప్రశ్న

హైదరాబాద్: తెలుగుదేశం పార్టీ అధినేత నారా చంద్రబాబు నాయుడుపై సిబిఐ విచారణ కోరిన వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ దివంగత వైయస్ రాజశేఖర రెడ్డి, మంత్రివర్గంపై ఎందుకు విచారణ కోరలేదని టిడిపి సీనియర్ శాసనసభ్యులు పయ్యావుల కేశవ్ బుధవారం మీడియా సమావేశంలో ప్రశ్నించారు. కాకినాడు పోర్టు లీజులో అక్రమాలు వైయస్ హయాంలో జరిగినవే అన్నారు. వైయస్ పోర్టు లీజులను తన అస్మదీయులకు యాభై ఏళ్లు అంటే సుమారు ఒక జీవిత కాలం ఇచ్చారని ఆరోపించారు.

లీజులను ఆర్థిక, న్యాయశాఖలు వ్యతిరేకించినా మంత్రుల బృందం ఓకె చెప్పిందని ధ్వజమెత్తారు. వైయస్ మినిమం గ్యారెంటీ ఎత్తివేయడంపై విజయమ్మ కోర్టులో ఎందుకు కేసు వేయలేదన్నారు. చంద్రబాబు ట్రస్టుపై కొందరు తప్పుడు రాతలు రాశారన్నారు. ఆ వార్తలు రాసిన వారు తమ అధినేత చేసిన సవాల్ కూడా రాస్తే బావుండేదన్నారు. ట్రస్టుకు సంబంధించిన ఫైళ్లు మొత్తం విమర్శలు చేసే వారి ముందు పెడతానని దానిపై పదిరోజులైనా చర్చించేందుకు సిద్ధమని బాబు గతంలోనే సవాల్ చేశారని గుర్తు చేశారు.

English summary

TDP senior MLA Payyavula Keshav quesioned YS Vijayamma about Kakinada port.