ఎమ్మెల్యేల చర్చలు, హైదరాబాదుకు వైయస్ జగన్

By Pratap

Published: Friday, December 2, 2011, 11:43 [IST]

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వంపై తెలుగుదేశం పార్టీ అవిశ్వాస తీర్మానానికి నోటీసు ఇచ్చిన నేపథ్యంలో వైయయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శాసనసభ్యులు చర్చలు జరిపారు. వారు శుక్రవారం ఉదయం శానససభ ఆవరణలో విడివిడిగానూ కలిసీ చర్చలు జరిపారు. పిల్లి సుభాష్ చంద్రబోస్, పిన్నెల్లి రామకృష్ణా రెడ్డి, మేకపాటి చంద్రశేఖర రెడ్డి, శ్రీకాంత్ రెడ్డి, అమర్నాథ్ రెడ్డి, శోభానాగిరెడ్డి తదితరులు చర్చలు జరిపారు. తెలుగుదేశం పార్టీ ఇచ్చిన నోటీసు మేరకు అవిశ్వాస తీర్మానంపై స్పీకర్ నాదెండ్ల మనోహర్ చర్చకు అనుమతిస్తే సభలో ఏ విధమైన వైఖరిని అవలంబించాలనే అంశంపై వారు చర్చలు జరిపారు.

కాగా, గుంటూరు జిల్లాలో ఓదార్పు యాత్ర చేస్తున్న వైయస్ జగన్ శుక్రవారం సాయంత్రం హైదరాబాద్ వస్తున్నారు. ఆయన తన వర్గానికి చెందిన శానససభ్యులతో చర్చలు జరిపే అవకాశాలున్నాయి. శని, ఆదివారాలు కూడా శాసనసభా సమావేశాలు జరుగుతుండడంతో సభలో అనుసరించాల్సిన వ్యూహంపై జగన్ శానససభ్యులతో చర్చలు జరుపుతారు. తెలుగుదేశం ప్రతిపాదించిన అవిశ్వాస తీర్మానానికి మద్దతిస్తామని వైయస్ జగన్ ఇప్పటికే ప్రకటించారు. అందువల్ల తన వర్గం శాసనసభ్యులు అనర్హత వేటుకు కూడా సిద్ధపడి అవిశ్వాసానికి మద్దతు ఇచ్చేలా చూడాలని ఆయన అనుకుంటున్నారు.

Published On December 2, 2011