జగన్‌వర్గంలో ఎంతమంది మిగులుతారో?: కొండా సురేఖ

హైదరాబాద్: కిరణ్ కుమార్ రెడ్డి ప్రభుత్వం పడిపోతుందనుకుంటే వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి మరికొంతమంది ఎమ్మెల్యేల మద్దతు ఉంటుందని పరకాల శాసనసభ్యురాలు కొండా సురేఖ ఆదివారం చెప్పారు. అవిశ్వాస తీర్మానం కోసం జగన్ వర్గం ఎమ్మెల్యేలు తగ్గొచ్చు పెరగవచ్చని ఆమె అన్నారు. వారి వారి అవసరాలు, సమస్యలననుసరించి ఎమ్మెల్యేలు నిర్ణయం తీసుకుంటారని చెప్పారు. జగన్ వర్గంలో ఎంతమంది మిగులుతారనే అంశం ఇప్పుడే తేల్చలేమని చెప్పారు. ప్రభుత్వానికి ఎలాంటి ఇబ్బంది లేదనే విశ్వాసం కాంగ్రెసు వర్గాల్లో ఉన్నప్పటికీ అది ఇప్పుడు చెప్పేది కాదని అవిశ్వాసం తర్వాత తెలుస్తుందన్నారు.

జగన్ సమావేశానికి తమ భర్త కొండా మురళీధర రావు వెళ్లారని చెప్పారు. తాను మొదటి నుండి ప్రభుత్వానికి వ్యతిరేకంగానే ఉన్నానని ఇప్పుడు కూడా ప్రభుత్వానికి వ్యతిరేకంగానే ఓటు వేస్తానని తేల్చి చెప్పారు. తెలంగాణ ప్రాంత కాంగ్రెసు ఎమ్మెల్యేలకు తెలంగాణపై చిత్తశుద్ధి ఉంటే అవిశ్వాసానికి అనుకూలంగా ఓటు వేయాలని డిమాండ్ చేశారు. ప్రభుత్వం పడిపోతేనే తెలంగాణ వస్తుందని ఆమె అభిప్రాయపడ్డారు. తాను తెలంగాణ కోసం ఇప్పటికే రాజీనామా చేశానని దానిని ఆమోదించినా అభ్యంతరం లేదని తాను మాత్రం ప్రభుత్వానికి వ్యతిరేకంగా ఓటు వేస్తానని చెప్పారు.

English summary

Parkal MLA Konda Konda Surekha said that Jagan camp mlas numbering will increase if government fall.