కెవిపితో సిఎం మంతనాలు, జగన్ వర్గానికి బుజ్జగింపులు

By Srinivas

Published: Sunday, December 4, 2011, 12:48 [IST]

హైదరాబాద్: ముఖ్యమంత్రి కిరణ్ కుమార్ రెడ్డితో దివంగత ముఖ్యమంత్రి వైయస్ రాజశేఖర రెడ్డి ఆత్మబంధువు కెవిపి రామచంద్రా రావు ఆదివారం భేటీ అయ్యారు. సిఎం, కెవిపి భేటీలో ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, రాజమండ్రి పార్లమెంటు సభ్యుడు ఉండవల్లి అరుణ్ కుమార్ కూడా పాల్గొన్నట్లు తెలుస్తోంది. వీరి మధ్య అవిశ్వాస తీర్మానంపై ప్రధానంగా చర్చకు వచ్చినట్లు తెలుస్తోంది. రాజకీయాల్లో తలపండిన కెవిపి సలహాలు తీసుకునేందుకే సిఎం భేటీ అయినట్లుగా తెలుస్తోంది. వీరి మంతనాలు సుదీర్ఘంగా సాగాయి.

మరోవైపు జగన్ వర్గం ఎమ్మెల్యేలను ముఖ్యమంత్రి కిరణ్ కుమార్ రెడ్డి బుజ్జగించే ప్రయత్నాలు జోరుగా కొనసాగిస్తున్నారు. అవిశ్వాసాన్ని ఎదుర్కొనడానికి ఆయనే నేరుగా రంగంలోకి దిగి జగన్ ఎమ్మెల్యేలతో జోరుగా మంతనాలు సాగిస్తున్నారు. ఉదయం ఆయన కాపు రామచంద్రా రెడ్డితో భేటీ అయ్యారు. మంత్రి ఏరాసు ప్రతాప్ రెడ్డి కాపును సిఎం వద్దకు తీసుకు వచ్చారు.

Published On December 4, 2011