బర్త్‌డే వేడుకలకు సోనియా దూరం, ఆరోగ్య సమస్యలేనా?

By Srinivas

Published: Wednesday, December 7, 2011, 14:43 [IST]

హైదరాబాద్: డిసెంబర్ 9వ తేదిన తన పుట్టిన రోజు సందర్భంగా పార్టీ కార్యకర్తలు, అభిమానులు ఎవరు కూడా డబ్బులు ఖర్చు పెట్టుకొని, వ్యయ ప్రయాసలకోర్చి ఢిల్లీ వరకు రావద్దని ఏఐసిసి అధ్యక్షురాలు సోనియా గాంధీ విజ్ఞప్తి చేశారు. కార్యకర్తలు, అభిమానులు రావడం ద్వారా ప్రజా జీవనానికి కూడా అసౌకర్యం కలుగుతుందని ఇది తనకు ఇష్టం లేదని ఆమె ప్రకటించారు. అయితే ఎవరూ రావొద్దంటూ ప్రకటన చేయడంతో ఆమెకు మళ్లీ ఏమైనా అనారోగ్య సమస్యలా? అనే అనుమానం అభిమానుల్లో వ్యక్తమవుతోంది. సోనియా గాంధీ ప్రకటన విషయం పార్టీ జనరల్ సెక్రటరీ జనార్దన్ ద్వివేదీ కార్యకర్తలకు బుధవారం తెలియజేశారు. సోనియా వేడుకలు జరుపుకోవడం లేదని చెప్పారు. ఆమె ఇటీవలె విదేశాలలో ట్రీట్ మెంట్ తీసుకొని వచ్చిన విషయం తెలిసిందే.

కాగా ఈ శుక్రవారం సోనియా గాంధీ అరవై ఆరవ జన్మదినోత్సవాన్ని జరుపుకోనున్నారు. గత ఏడాది కూడా ఆమె ఇలాగే ప్రకటించి, జన్మదినాన్ని పూర్తిగా వ్యక్తిగత వ్యవహారంగా జరుపుకున్నారు. అయితే ఆమె ప్రకటనను పట్టించుకోకుండా తెల్లవారుజామునే అభిమానులు పెద్ద ఎత్తున చేరుకున్నారు. మరి ఈసారి అభిమానులు ఆమె ప్రకటనను అర్థం చేసుకొని ఊరుకుంటారా? చూడాలి.

Published On December 7, 2011