గాంధీ భవన్‌లో సిఎం కిరణ్, బొత్స: చిరంజీవి గైర్హాజరు

By Srinivas

Published: Wednesday, December 28, 2011, 15:22 [IST]

హైదరాబాద్: ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణ, పిసిసి మాజీ సారథి డి శ్రీనివాస్ ఇతర నేతలు బుధవారం గాంధీ భవన్లో జరిగిన కాంగ్రెసు పార్టీ 127వ ఆవిర్భావ దినోత్సవానికి హాజరయ్యారు. తిరుపతి శాసనసభ్యుడు చిరంజీవి గాంధీ భవన్ కార్యక్రమానికి హాజరు కాలేదు. ఆవిర్భావ దినోత్సవం సందర్భంగా పిసిసి చీఫ్ బొత్స పార్టీ జెండాను ఎగురవేశారు. అనంతరం ఆయన మాట్లాడారు. దేశ సమైక్యత కోసమే సోనియా గాంధీ పదవిని త్యాగం చేశారన్నారు. అభివృద్ధి, సంక్షేమమే లక్ష్యంగా పార్టీ ముందుకు వెళుతుందన్నారు. అనైక్యత కారణంగానే పార్టీ బలహీనపడుతుందని డి శ్రీనివాస్ అన్నారు.

పార్టీకి బలం కార్యకర్తలేనని సిఎం కిరణ్ కుమార్ రెడ్డి అన్నారు. కార్యకర్తలు లేకుంటే పార్టీ లేదన్నారు. నేతలు వస్తారు వెళతారు కానీ కార్యకర్తలు మాత్రం ఎప్పుడూ పార్టీతోనే ఉంటారన్నారు. పార్టీ బలోపేతానికి అందరూ కృషి చేయాలన్నారు. అవినీతి నిర్మూలన కోసం కాంగ్రెసు లోక్‌పాల్ బిల్లు తెచ్చేందుకు కృషి చేస్తే విపక్షాలు రాజ్యాంగ సవరణకు అడ్డుపడుతున్నాయన్నారు.

Published On December 28, 2011