నటి ప్రత్యూష మృతి కేసు: సిద్ధార్థ రెడ్డికి శిక్ష తగ్గింపు

హైదరాబాద్: అప్పట్లో తీవ్ర సంచలనం సృష్టించిన సినీ నటి ప్రత్యూష మృతి కేసులో రాష్ట్ర హైకోర్టు బుధవారం తీర్పు వెలువరించింది. ఈ కేసులో ప్రత్యూష ప్రియుడిగా భావించిన సిద్ధార్థ రెడ్డికి కింది కోర్టు విధించిన శిక్షాకాలాన్ని హైకోర్టు తగ్గించింది. ప్రత్యూష 2002లో మరణించింది. తమ ప్రేమ పెళ్లికి పెద్దలు అంగీకరించకపోవడం సిద్ధార్థ రెడ్డి, ప్రత్యూష కూల్ డ్రింకులో విషం కలుపుకుని సేవించారని, దాని వల్ల ప్రత్యూష మరణించిందని వార్తలు వచ్చాయి. ఆస్పత్రిలో చికిత్స పొందిన సిద్ధార్థ రెడ్డి మాత్రం బతికి బయటపడ్డారు. ప్రత్యూష మృతి కేసులో సిద్ధార్థ రెడ్డికి ఆరేళ్ల కారాగారవాసాన్ని విధించింది. దీనిపై సిద్దార్థ రెడ్డి హైకోర్టుకు వెళ్లాడు.

సిద్ధార్థ రెడ్డికి నాంపల్లి కోర్టు విధించిన ఆరేళ్ల శిక్షా కాలాన్ని హైకోర్టు రెండేళ్లకు కుదించింది. రూ. 50 వేల జరిమానా విధించింది. ప్రస్తుతం సిద్ధార్థ రెడ్డి బెయిల్‌పై బయటే ఉన్నాడు. 15 రోజుల్లో లొంగిపోవాలని హైకోర్టు సిద్ధార్థ రెడ్డిని ఆదేశించింది. ఇప్పటికే సిద్ధార్థ రెడ్డి 115 రోజులు జైలులో గడిపాడు. హైకోర్టు తీర్పుపై ప్రత్యూష తల్లి సరోజిని స్పంధించారు. హైకోర్టులో తమకు న్యాయం జరగలేదని ఆమె అన్నారు. ప్రత్యూష మృతి వ్యవహారం అప్పట్లో తీవ్ర సంచలనం కలిగించింది. పలువురు పెద్దల కుమారులు ఆమె మృతికి కారణమంటూ ఆరోపణలు వచ్చాయి.

హైకోర్టు తీర్పును సవాల్ చేస్తూ తాను సుప్రీంకోర్టుకు వెళ్తానని సరోజినీ చెప్పారు. తమకు హైకోర్టులో న్యాయం జరగలేదని ఆమె అన్నారు. మునుస్వామి ఇచ్చిన పోస్టుమార్టం నివేదికను పరిగణనలోకి తీసుకోలేదని చెప్పారు. తన కూతురుని చంపినవారికి దేవుడు తప్పకుండా శిక్ష విధిస్తాడని అన్నారు.

English summary

High Court delivered its judgement in actress Prathyusha death case.