విజయమ్మ ఓదార్పు యాత్ర, జగన్‌కు బ్రేకులు పడితే?

హైదరాబాద్: కేసుల కారణంగా వైయస్సార్ కాంగ్రెసు పార్టీ అధ్యక్షుడు వైయస్ జగన్ ఓదార్పు యాత్రకు బ్రేకులు పడితే ఆయన తల్లి, శాసనసభ్యురాలు వైయస్ విజయమ్మ ఓదార్పు యాత్ర చేపట్టేందుకు రంగం సిద్ధమవుతున్నట్లు వార్తలు వస్తున్నాయి. వైయస్ జగన్ కృష్ణా జిల్లా మైలవరం కుల్తీ సారా బాధితులను పరామర్శించనున్నారు. ఆ తర్వాత ఫీజు రీయంబర్స్‌మెంట్‌ను విడుదల చేయాలని కోరుతూ ఆయన జనవరి 4వ తేదీన ఒంగోలులో జరిగే ధర్నాలో పాల్గొంటారు. ఆ తర్వాత గుంటూరు జిల్లాలో తన ఓదార్పు యాత్రను కొనసాగిస్తారు. జగన్ అరెస్టు జరిగితే వైయస్ విజయమ్మ ఓదార్పు యాత్రను చేపడతారని అంటున్నారు.

జగన్‌ను జనవరిలోనే సిబిఐ అరెస్టు చేసే అవకాశాలున్నాయని, ఎన్‌ఫోర్స్‌మెంట్ డైరెక్టరేట్ (ఈడి) జగతి పబ్లికేషన్స్ ఖాతాలను స్తంభింపజేసే అవకాశాలున్నాయని ఓ ఆంగ్ల దినపత్రిక రాసింది. అదే జరిగితే వైయస్ విజయమ్మ పార్టీ పగ్గాలను తన చేతిలోకి తీసుకుని, ఓదార్పు యాత్రను కూడా చేపడతారని వైయస్సార్ కాంగ్రెసు పార్టీకి చెందిన అధికార ప్రతినిధి ఒకరు తమతో చెప్పినట్లు ఆ పత్రిక రాసింది. జగన్ అరెస్టు జరిగితే పార్టీకి మేలే జరుగుతుందనే అభిప్రాయం కూడా పార్టీలో వ్యక్తమవుతున్నట్లు ఆ పత్రిక రాసింది. జగన్ కాంగ్రెసుతో కుమ్మక్కయ్యారనే ప్రచారానికి దాంతో తెర పడుతుందని అంటున్నారు.

వైయస్సార్ కాంగ్రెసు పార్టీ వ్యవహారాలు తమకేమీ నష్టం కలిగించవని కాంగ్రెసు పార్టీ వర్గాలంటున్నాయి. ఎన్నికలకు రెండున్నరేళ్లు ఉన్నాయని, అప్పటికి జగన్ ప్రభావం పూర్తిగా తగ్గుతుందని ఆ వర్గాలు దీమా వ్యక్తం చేస్తున్నాయి. అయితే, వైయస్సార్ కాంగ్రెసు పార్టీ వర్గాలు తెలంగాణ ఉప ఎన్నికల్లో పోటీపై, తెలంగాణలో జగన్ ఓదార్పు యాత్రపై మల్లగుల్లాలు పడుతున్నాయి.

English summary

According to news reports - Pulivendula legislator Vijayamma, mother of Mr Jagan Mohan Reddy, will take over the reins of the party affairs and will undertake the Odarpu tour.