అప్పుడైతే బుజ్జగిస్తారు: కెసిఆర్‌కు టిజి వెంకటేష్ సూచన

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు 2013లో అల్లరి చేస్తే బుజ్జగించే వారు ఉంటారని చిన్న నీటి పారుదల శాఖ మంత్రి టిజి వెంకటేష్ బుధవారం అన్నారు. బంజారాహిల్స్‌లో నూతన సంవత్సర క్యాలెండర్‌ను ఆయన ఆవిష్కరించారు. అనంతరం ఆయన మీడియాతో మాట్లాడారు. కెసిఆర్ ప్రస్తుతం నిరాహార దీక్షలు మానుకోవాలని సూచించారు. అంతగా చేయాలనుకుంటే 2013లో చేయాలని, అప్పుడైతే వచ్చే ఎన్నికల వరకు ఆయనకు సానుభూతి దొరుకుతుందని ఎద్దేవా చేశారు. బక్క చిక్కి ఉన్న ఆయన దీక్ష చేయలేరని, చేసినా రెండో రోజు చికిత్స కోసం హాస్పిటల్ తీసుకెళతారన్నారు. ప్రళయం వచ్చే పరిస్థితి ఉంటే మాత్రం ఎవరూ బతికి ఉండరన్నారు.

ఉప ఎన్నికల్లో అన్ని స్థానాల్లోనూ కాంగ్రెసు పార్టీయే గెలుస్తుందని ధీమా వ్యక్తం చేశారు. ముఖ్యమంత్రి కిరణ్ కుమార్ రెడ్డి రాష్ట్రంలో ప్రశాంత వాతావరణం కల్పించేందుకు ప్రయత్నిస్తున్నారన్నారు. అభివృద్ధి, యువతకు ఉద్యోగాలు, ప్రాజెక్టుల పూర్తి, గతంలో ఇచ్చిన పథకాల హామీలపై సిఎం దృష్టి సారించారన్నారు. రబ్బర్ బుల్లెట్ తగలకుండా ఉద్యమాన్ని అణిచి వేశారన్నారు. ప్రభుత్వం పనితీరుపై ఓట్లు వేస్తే రానున్న ఎన్నికల్లో కాంగ్రెసు పార్టీ అధికారం చేపట్టటం ఖాయమన్నారు.

English summary

Minister TG Venkatesh suggested TRS chief K Chandrasekhar Rao that to take fast in 2013.