జగన్‌ ది పిల్ల పార్టీ, ఆయననూ అడ్డుకుంటాం: రాములమ్మ

హైదరాబాద్: వైయస్ జగన్‌కు చెందిన వైయస్సార్ కాంగ్రెసు పార్టీని తెలంగాణ రాష్ట్ర సమితి (తెరాస) పార్లమెంటు సభ్యురాలు విజయశాంతి పిల్ల పార్టీగా అభివర్ణించారు. తెలంగాణపై వైఖరిని స్పష్టం చేయకపోతే వైయస్ జగన్ తెలంగాణ పర్యటనలను అడ్డుకుంటామని ఆమె బుధవారం మీడియా ప్రతినిధుల సమావేశంలో చెప్పారు. తెలంగాణపై కాంగ్రెసు, తెలుగుదేశం పార్టీలు డ్రామాలు చేస్తున్నాయని ఆమె అన్నారు. తాను, తమ పార్టీ అధ్యక్షుడు కె. చంద్రశేఖర రావు తెలంగాణవాదులం కాకపోతే ముఖ్యమంత్రి కిరణ్ కుమార్ రెడ్డి, తెలుగుదేశం పార్టీ అధ్యక్షుడు చంద్రబాబు నాయుడు తెలంగాణవాదులా అని ఆమె ప్రశ్నించారు. చంద్రబాబు వరంగల్ జిల్లా పర్యటనను తానే ముందుండి అడ్డుకుంటానని ఆమె చెప్పారు. చంద్రబాబు వరంగల్ జిల్లా పర్యటన సందర్భంగా సంభవించే పరిణామాలకు తెలుగుదేశం పార్టీదే బాధ్యత అని ఆమె అన్నారు.

కెసిఆర్ ఉరేసుకోవాలంటూ తెలుగుదేశం తెలంగాణ ప్రాంత శాసనసభ్యుడు మోత్కుపల్లి నర్సింహులు చేసిన ప్రకటనపై ఆమె తీవ్రంగా మండిపడ్డారు. చంద్రబాబు రైతు పోరు బాటు చేసిన రైతుల గురించి మాట్లాడకుండా కెసిఆర్‌పై విమర్శలు చేయడమేమిటని ఆమె అడిగారు. కెసిఆర్‌పై టిడిపి నాయకులు అసభ్యంగా మాట్లాడుతున్నారని ఆయన అన్నారు. ఒక్క పార్టీ అధ్యక్షుడిని పట్టుకుని చచ్చిపోవాలని అంటారా ఆమె ప్రశ్నించారు. తెలంగాణపై చంద్రబాబు 2009 తీర్మానానికి కట్టుబడి ఉన్నారా, లేదా చెప్పాలని ఆమె డిమాండ్ చేశారు. ఉప ఎన్నికలకు తాము భయపడడం లేదని, కాంగ్రెసు, తెలుగుదేశం పార్టీలే భయపడుతున్నాయని విజయశాంతి అన్నారు.

English summary

TRS MP Vijayashanthi has termed YS Jagan's YSR Congress as small party.