ఎమ్మార్ కేసు: చంద్రబాబుకు సుప్రీం కోర్టు నోటీసు

By Srinivas

Published: Monday, January 9, 2012, 15:26 [IST]

న్యూఢిల్లీ: ఎమ్మార్ కేసులో తెలుగుదేశం పార్టీ అధినేత నారా చంద్రబాబు నాయుడుకు అత్యున్నత న్యాయస్థానం సుప్రీం కోర్టు సోమవారం నోటీసులు జారీ చేసింది. ఎమ్మార్ వ్యవహారంలో చంద్రబాబును కూడా విచారించాలని భీంరెడ్డి ఎల్లారెడ్డి అనే వ్యక్తి వేసిన పిటిషన్‌ను సుప్రీం కోర్టు విచారించింది. అనంతరం చంద్రబాబుతో పాటు కేంద్ర, రాష్ట్ర ప్రభుత్వాలు, సిబిఐకి సుప్రీంకోర్టు నోటీసులు జారీ చేసింది. కాగా ఎమ్మార్ కేసును సిబిఐ విచారిస్తున్న విషయం తెలిసిందే. ఈ వ్యవహారంలో ఇప్పటికే పలువురు ప్రముఖులను సిబిఐ విచారించింది. ఎమ్మార్ హిల్స్‌లో ప్లాట్లు కొన్న వారిని కూడా విచారించింది. అందులో ప్లాట్ కొన్న బాబు కోడలు, హీరో బాలకృష్ణ తనయను కూడా సిబిఐ విచారించింది.

ఎమ్మార్ కుంభకోణం బాబు హయాంలోనే జరిగిందని వైయస్సార్ కాంగ్రెసు పార్టీ నేతలతో పాటు పలువురు ఆరోపిస్తున్నారు. ఆదివారం సిబిఐ విచారణను ఎదుర్కొన్న వైయస్సార్ కాంగ్రెసు పార్టీ అధికార ప్రతినిధి అంబటి రాంబాబు కూడా విచారణ అనంతరం మీడియాతో మాట్లాడుతూ.. బాబు హయాంలోనే ఎమ్మార్ అక్రమాలు జరిగాయని ఆరోపించారు. ఈ కేసులో బాబును కూడా విచారించాలని తాను సిబిఐని కోరినట్లు చెప్పారు.

Published On January 9, 2012