ఉద్యోగాల ఎర చూపి మోసం చేసిన ఆలుమగల అరెస్టు

By Pratap

Published: Wednesday, January 11, 2012, 9:56 [IST]

హైదరాబాద్: ఉద్యోగాల ఎర చూపి పలువురు ఇంజనీరింగ్ అభ్యర్థులను మోసం చేసిన ఆలుమగలను నేర పరిశోధక విభాగం (సిఐడి) పోలీసులు అరెస్టు చేశారు. ఐబియం వంటి ప్రముఖ కంపెనీల్లో ఉద్యోగాలు ఇప్పిస్తామని తూర్పు గోదావరి జిల్లా రాజమండ్రికి చెందిన ఆ దంపతులు హామీ ఇచ్చి మోసం చేశారు. కె. ప్రవీణ, శేషు కిరణ్ అనే ఇద్దరు రాష్ట్రవ్యాప్తంగా పలు ఇంజనీరింగ్ కళాశాలలకు వెళ్లి మార్చ్ - ఎండ్ కన్సల్టెన్సీ పేరు మీద క్యాంపస్ రిక్రూట్‌మెంట్స్ చేపట్టారు. వివిధ వృత్తి కళాశాలల నుంచి ఉద్యోగులను నియమించడానికి తమ సంస్థను కన్సల్టెంట్ కంపెనీగా ఐబిఎం, ఎంఫసిస్, ఎల్కోన్ గుర్తించాయని వారు చెప్పుకున్నారు.

ఓడలరేవు బివిసి ఇంజనీరింగ్ కళాశాలను సందర్శించి ఒక్కో విద్యార్థి నుంచి 500 రూపాయల చొప్పున వసూల చేశారు.. వారు 113 మంది విద్యార్థుల నుంచి 12 లక్షల రూపాయలు వసూలు చేసినట్లు సిఐడి పోలీసులు చెప్పారు. వారు తొమ్మిది కళాశాలల్లో అదే తంతు నిర్వహించినట్లు దర్యాప్తులో వెల్లడైంది. కాకినాడ రాజీవ్ గాంధీ ఇనిస్టిట్యూట్ ఆఫ్ మేనేజ్‌మెంట్ అండ్ సైన్స్, విఎస్ లక్ష్మి వుమెన్స్ కాలేజెస్, ఆదిత్య ఇంజనీరింగ్ కాలేజీ అండ్ ఫార్మసీ, కెఐఇటి ఇంజనీరింగ్ కాలేజీ, యానాంలోని రీజెన్సీ ఇనిస్టిట్యూట్ ఆఫ్ టెక్నాలజీ, కాకినాడ ప్రగతి ఇంజనీరింగ్ కాలేజీ, తాడేపల్లిగూడెంలోని శశి ఇంజనీరింగ్ కాలేజీ, రంగారెడ్డి జిల్లా కందుకూరు నిఖిత ఇంజనీరింగ్ కాలేజీల్లో ఆ దంపతులు డబ్బులు వసూలు చేశారు.

Published On January 11, 2012