పిఆర్పీలో ఉంటే చిరంజీవికి వివరణ ఇస్తా: శోభానాగిరెడ్డి

By Srinivas

Published: Tuesday, January 17, 2012, 13:42 [IST]

హైదరాబాద్: తిరుపతి శాసనసభ్యుడు చిరంజీవి ప్రజారాజ్యం పార్టీలో ఉంటే తాను పార్టీ ధిక్కార తాఖీదులకు వివరణ ఇచ్చేందుకు సిద్ధంగా ఉన్నానని కర్నూలు జిల్లా ఆళ్లగడ్డ శాసనసభ్యురాలు, వైయస్ జగన్మోహన్ రెడ్డి వర్గం నేత శోభా నాగి రెడ్డి మంగళవారం అన్నారు. ప్రజారాజ్యం పార్టీ కాంగ్రెసులో విలీనమయ్యాక తాను ఎవరికి వివరణ ఇవ్వాలని ఆమె ప్రశ్నించారు. తెలుగుదేశం పార్టీ అధినేత నారా చంద్రబాబు నాయుడు ఆస్తుల కేసును ఇతర కోర్టులకు బదలీ చేయాలన్న వైయస్సార్ కాంగ్రెసు పార్టీ గౌరవ అధ్యక్షురాలు వైయస్ విజయమ్మ పిటిషన్‌ను సుప్రీం కోర్టు వెనక్కి తీసుకోవాలని సూచించటం చెంపపెట్టు వంటిదని టిడిపి నేతలు అనటం హాస్యాస్పదమన్నారు. ఆస్తుల విచారణపై స్టే తెచ్చుకున్న వారికి వైయస్సార్ కాంగ్రెసును విమర్శించే అర్హత లేదన్నారు. స్టే తెచ్చుకొని మాట్లాడితే ప్రజలు హర్షించరన్నారు. స్పీకర్ నాదెండ్ల మనోహర్ వెంటనే తమ అనర్హత పిటిషన్‌పై నిర్ణయం తీసుకోవాలని ఆమె కోరారు.

కాగా గత డిసెంబర్‌లో టిడిపి కిరణ్ ప్రభుత్వంపై అవిశ్వాస తీర్మానం పెట్టినప్పుడు పిఆర్పీ విప్ ధిక్కరించి శోభా నాగి రెడ్డి ప్రభుత్వానికి వ్యతిరేకంగా ఓటు వేసిన విషయం తెలిసిందే. ఆమెపై చర్యలు తీసుకోవాలని పిఆర్పీ విప్ వంగా గీత స్పీకర్ నాదెండ్ల మనోహర్ ఫిర్యాదు చేశారు. శోభా నాగి రెడ్డికి నోటీసులు జారీ చేసిన స్పీకర్ నోటీసులు జారీ చేశారు. ఆమె బుధవారం స్పీకర్ ఎదుట హాజరు కానున్నారు.

Published On January 17, 2012