బాలకృష్ణపై చిరంజీవి చెప్పింది వాస్తవం: లక్ష్మీపార్వతి

By Srinivas

Published: Wednesday, January 18, 2012, 9:57 [IST]

హైదరాబాద్: తిరుపతి శాసనసభ్యుడు, కాంగ్రెసు నేత చిరంజీవి చెప్పినట్లు నందమూరి బాలకృష్ణది చిన్న పిల్లాడి మనస్తత్వమని ఎన్టీఆర్ టిడిపి అధ్యక్షురాలు, దివంగత నందమూరి తారక రామారావు సతీమణి లక్ష్మీ పార్వతి బుధవారం అన్నారు. ఎన్టీఆర్ పదహారవ వర్దంతి సందర్భంగా ఆమె ఎన్టీఆర్ ఘాట్‌కు వచ్చి నివాళులర్పించారు. అనంతరం ఆమె మాట్లాడారు. బాలయ్యది పిల్లాడి మనస్తత్వమేనన్నారు. తెలుగుదేశం పార్టీ అధినేత నారా చంద్రబాబు నాయుడు వెంట ఉన్నంత కాలం బాలకృష్ణను రాష్ట్ర ప్రజలు ఆశీర్వదించరన్నారు. ఆయన సొంతగా పార్టీ పెట్టాలి లేదా తెలుగుదేశం పార్టీని హస్తగతం చేసుకోవాలి అప్పుడే ఆయనకు రాజకీయ భవిష్యత్తు ఉంటుందని చెప్పారు.

వైయస్సార్ కాంగ్రెసు పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డికి ఉన్న ప్రజాధరణ ఓట్ల రూపంలోకి మారుతుందా లేదా ఇప్పుడే చెప్పలేమన్నారు. చంద్రబాబు నాయుడు ఎలాంటి అవినీతికి పాల్పడకుంటే హైకోర్టుకు వెళ్లి స్టే ఎందుకు తెచ్చుకున్నారని ప్రశ్నించారు. టిడిపి వ్యవస్థాపకులు ఎన్టీఆర్ ఆశయాలకు ఆ పార్టీ దూరంగా ఉన్నందు వల్లే ప్రజలు ఆ పార్టీని అధికారానికి దూరంగా ఉంచుతున్నారన్నారు.

Published On January 18, 2012