శాఖలపై చిరంజీవి మీద నెగ్గిన కిరణ్ కుమార్ రెడ్డి

By Pratap

Published: Saturday, January 21, 2012, 10:12 [IST]

హైదరాబాద్: మంత్రి వర్గ విస్తరణ విషయంలో తాను నెగ్గకపోయినా ఇద్దరు మంత్రులకు శాఖల కేటాయింపు విషయంలో ముఖ్యమంత్రి కిరణ్ కుమార్ రెడ్డి తన మాట నెగ్గించుకున్నారు. ఆ రకంగా చిరంజీవిపై తనదే పైచేయిగా అనిపించుకున్నారు. అయితే, ప్రస్తుతం కేటాయించిన శాఖలు తాత్కాలికమేనని, త్వరలోనే శాఖల మార్పు జరుగుతుందని కిరణ్ కుమార్ రెడ్డి చిరు వర్గానికి చెందిన కొత్త మంత్రులు సి. రామచంద్రయ్యకు, గంటా శ్రీనివాస రావుకు నచ్చజెప్పినట్లు తెలుస్తోంది. దీంతో వారు వెనక్కి తగ్గినట్లు చెబుతున్నారు. ప్రాధాన్యం లేని శాఖల కేటాయింపుపై చిరంజీవి తీవ్ర అసంతృప్తి వ్యక్తం చేసిన విషయం తెలిసిందే. చిరంజీవి వర్గానికి చెందిన సి.రామచంద్రయ్యకు దేవాదాయ శాఖ, గంటా శ్రీనివాసరావుకు పెట్టుబడులు, మౌలిక సదుపాయాలు, రేవుల శాఖను అప్పగించి, వారిని వాటికే పరిమితం చేశారు.

గురువారం ప్రమాణ స్వీకారం చేసిన సి. రామచంద్రయ్యను, గంటా శ్రీనివాసరావును శుక్రవారం ఉదయం అల్పాహార విందుకు క్యాంప్ కార్యాలయానికి పిలిపించుకున్నారు. కొత్తగా వచ్చిన వారికి కీలక శాఖలు అప్పగిస్తే... అలకలు, అసంతృప్తులు మరింత పెరుగుతాయని, ప్రస్తుతానికి ఈ శాఖలతోనే సరిపెట్టుకోండని కిరణ్ వారికి చెప్పినట్లు తెలిసింది. పీసీసీ చీఫ్ బొత్స సత్యనారాయణ కూడా రంగంలోకి దిగి, శాఖల విషయంలో పంతానికి పోవద్దని కొత్త మంత్రులకు చెప్పినట్లు సమాచారం. దీంతో శాఖల కేటాయింపు గొడవ సద్దుమణిగింది. శనివారం జరిగే పార్టీ సమన్వయ కమిటీ సమావేశంలో ఈ విషయంపై చర్చ జరిగే అవకాశం ఉంది. ఈ సమావేశంలో గులాం నబీ ఆజాద్ సమక్షంలో శనివారం సాయంత్రం జరుగుతుంది.

Published On January 21, 2012