తెలంగాణపై తగ్గేది లేదు, ద్రోహుల కార్లలో వద్దు: ఎంపీలు

By Srinivas

Published: Monday, January 30, 2012, 16:04 [IST]

హైదరాబాద్: తెలంగాణపై ఎట్టి పరిస్థితుల్లోనూ తాము వెనక్కి తగ్గేది లేదని తెలంగాణ ప్రాంత కాంగ్రెసు పార్లమెంటు సభ్యులు సోమవారం స్పష్టం చేశారు. కె కేశవ రావు, మధు యాష్కీ తదితర పార్లమెంటు సభ్యులు సోమవారం భేటీ అయ్యారు. అనంతరం వారు మీడియాతో మాట్లాడారు. తెలంగాణ ప్రజల్లో ప్రత్యేక రాష్ట్ర వాదం తగ్గలేదన్నారు. రాష్ట్రం వచ్చే వరకు అందరం కలిసి కట్టుగా ఉద్యమిస్తామన్నారు. ఇందుకోసం ఏఐసిసి అధ్యక్షురాలు, యుపిఏ చైర్ పర్సన్ సోనియా గాంధీతో, అధిష్టానంతో మాట్లాడతామని వారు చెప్పారు. సకల జనుల సమ్మె సమయంలో ప్రభుత్వం ఇచ్చిన హామీలు నెరవేర్చలేదన్నారు. వాటిని నెరవేర్చే దిశలో కృషి చేస్తామని చెప్పారు.

మంగళవారం టిఎన్జీవోలు తలపెట్టిన నిరసనకు తమ మద్దతు ప్రకటిస్తున్నామని చెప్పారు. తెలంగాణ ద్రోహులతో కలిసి ఎవ్వరూ వెళ్లవద్దన్నారు. తెలంగాణ ద్రోహులతో కలిసి కార్లలో తిరగవద్దని, వారి ఇళ్లకు వెళ్లవద్దన్నారు. హామీ మేరకు ఉద్యమంలో పాల్గొన్న తెలంగాణ విద్యార్థులు, ఉద్యమకారులపై కేసులు ఎత్తివేసే బాధ్యత ప్రభుత్వం మీదే ఉందన్నారు. ఐదు రాష్ట్రాలలో ఎన్నికలు ఉన్నందున త్వరలోనే మరోసారి సమావేశమై చర్చించి, భవిష్యత్తు ప్రణాళిక ప్రకటిస్తామని అన్నారు. అందరం ఐక్యంగా పోరాడుతామన్నారు. తెలంగాణ వాదులంతా ఏకం కావాలని వారు పిలుపునిచ్చారు.

Published On January 30, 2012