సిబిఐ దిగజారుడు విచారణ: వైయస్ జగన్ పార్టీ నేత

హైదరాబాద్: సిబిఐది దిగజారుడు విచారణ అని వైయస్ జగన్ నేతృత్వంలోని వైయస్సార్ కాంగ్రెసు పార్టీ నాయకుడు కొణతాల రామకృష్ణ వ్యాఖ్యానించారు. ఎమ్మార్ కేసులో అరెస్టయిన కోనేరు ప్రసాద్ నుంచి విరాళాలు తీసుకున్న ఇతర పార్టీలపై సిబిఐ విచారణ ఎందుకు జరపడం లేదని ఆయన సోమవారం మీడియా ప్రతినిధుల సమావేశంలో విమర్శించారు. వైయస్ జగన్ ఆస్తుల కేసులో ఆధారాలు లేకపోవడం వల్లనే విజయ సాయి రెడ్డికి నార్కో టెస్టులు జరపడానికి సిబిఐ అనుమతి కోరుతోందని ఆయన విమర్శించారు. సిబిఐ కోర్టులను తప్పు దోవ పట్టిస్తోందని ఆయన విమరశించారు. కాంగ్రెసుకు ధైర్యం ఉంటే స్థానిక సంస్థల ఎన్నికలు నిర్వహించాలని ఆయన సవాల్ చేశారు.

కొందరి కనుసన్నల్లో సిబిఐ పనిచేస్తోందని ఆయన అన్నారు. తమ నేత జగన్ లక్ష్యంగా మాత్రమే సిబిఐ అధికారుల విచారణ జరుగుతోందని ఆయన విమర్శించారు. నార్కో అనాలిసిస్ టెస్టు పేరుతో విజయ సాయి రెడ్డి చెప్పని విషయాలను కూడా చెప్పినట్లు సిబిఐ వెల్లడించే అవకాశాలున్నాయని ఆయన అనుమానం వ్యక్తం చేశారు. కోర్టు ఆదేశాలకు విరుద్ధంగా సిబిఐ విచారణ జరుగుతోందని ఆయన అన్నారు. 2014 ఎన్నికల లోపు జగన్‌ను అణగదొక్కే కుట్ర అమలవుతోందని ఆయన అన్నారు. ప్రధాని జోక్యం చేసుకుని నిష్పక్షపాతంగా విచారణ జరిగేలా చూస్తారని నమ్మకంతోనే విజయమ్మ లేఖ రాశారని ఆయన చెప్పారు.

English summary

YSR Congress leader Konathala Ramakrishna accused that CBI is targeting YS Jagan.