జగన్ కేసు: అరబిందో కార్యాలయాల్లో సిబిఐ సోదాలు

హైదరాబాద్: వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో సిబిఐ దర్యాప్తును వేగవంతం చేసింది. అరబిందో ఫార్మా కంపెనీల కార్యాలయాలపై సిబిఐ సోదాలు నిర్వహిస్తోంది. బాచుపల్లి అరబిందో ఫార్మా కంపెనీలో సిబిఐ అధికారులు సోదాలు నిర్వహిస్తున్నారు. అలాగే, మహబూబ్‌నగర్ జిల్లా పోలెపల్లి ప్రత్యేక ఆర్థిక మండలి (సెజ్)లోని కార్యాలయంలో కూడా సోదాలు నిర్వహిస్తున్నారు. మిగతా ప్రాంతాల్లోని అరబిందో ఫార్మా కార్యాలయాల్లో కూడా సిబిఐ అధికారులు తనిఖీలు చేపట్టారు. వైయస్ జగన్ ఆస్తుల కేసులో 70 కంపెనీలను సిబిఐ నిందితులుగా చేర్చింది.

వైయస్ జగన్ ఆస్తుల కేసులో ఏప్రిల్ మొదటి వారంలోగా సిబిఐ చార్జిషీట్ దాఖలు చేయాల్సి ఉంది. ఈ కేసులో ఇప్పటి వరకు వైయస్ జగన్‌కు చెందిన సాక్షి దినపత్రికను ప్రచురించే జగతి పబ్లికేషన్స్ వైస్ చైర్మన్ విజయసాయి రెడ్డిని మాత్రమే సిబిఐ అరెస్టు చేసింది. ఈ కేసులో వైయస్ రాజశేఖర రెడ్డి ప్రభుత్వ హయాంలో ప్రధాన కార్యదర్శులుగా పనిచేసిన సీనియర్ ఐఎఎస్ అధికారులను కూడా ప్రశ్నిస్తోంది. ఇప్పటి వరకు రమాకాంత్ రెడ్డి, ఎ. రఘోత్తమ రావులను సిబిఐ విచారించింది. మరో ముగ్గురు ఐఎఎస్ అధికారులను కూడా సిబిఐ ప్రశ్నించే అవకాశాలున్నట్లు చెబుతున్నారు.

English summary

CBI raided on Aurobindo Pharma Company offices in YSR Congress president YS Jagan assets case.