నాకు ఫ్రీ పబ్లిసిటీ, చిరంజీవిపై ఒత్తిడి తెస్తున్నాం: గంటా

By Srinivas

Published: Thursday, February 16, 2012, 8:49 [IST]

హైదరాబాద్: కృష్ణా జిల్లాలోని భవానీ ద్వీపం లీజు వ్యవహారంపై తెలుగుదేశం పార్టీ చేస్తున్న ఆరోపణలతో తనకు ఫ్రీ పబ్లిసిటీ వస్తోందని మంత్రి గంటా శ్రీనివాస రావు అన్నారు. భవానీ ద్వీపం కాంట్రాక్టుపై తెలుగుదేశం పార్టీ నేతలు తీవ్రస్థాయిలో మండిపడుతున్న విషయం తెలిసిందే. దీనిపై గంటా స్పందించారు. లీజు వ్యవహారంపై సభలో చర్చకు అనుమతించాలని తాను స్పీకర్ నాదెండ్ల మనోహర్‌కు లేఖ ఇస్తానంటే, మంత్రిగా ఇవ్వకూడదన్నారని అందుకే తమ పార్టీ ఎమ్మెల్యేలతో లేఖ రాయిస్తున్నట్లు ఆయన చెప్పారు. టివి న్యూస్ ఛానల్ త్వరగా పెట్టాలని తమ నేత, తిరుపతి శాసనసభ్యుడు చిరంజీవిపై ఒత్తిడి తెస్తున్నట్లు ఆయన ఈ సందర్భంగా చెప్పారు.

భవానీ ద్వీపం విషయంలో టిడిపి నేతలపై కాంగ్రెసు నేతలు సిఎల్పీ కార్యాలయంలో ఎదురుదాడికి దిగారు. గంటా శ్రీనివాసరావుకు సంబంధించిన కంపెనీ కంటే అధిక మొత్తాన్ని చెల్లించేందుకు ఎవరైనా ముందుకొస్తే వారికి భవానీ ద్వీపం కాంట్రాక్టు అప్పగించేందుకు సిద్ధమేనని కాంగ్రెస్ శాసనసభాపక్షం పేర్కొంది. సిఎల్పీ కార్యాలయంలో ఎమ్మెల్యేలు జోగు రమేష్, రాజేశ్ తదితరులు విలేకరులతో మాట్లాడారు. ఈ ద్వీపంపై తెలుగుదేశం పార్టీ అధినేత నారా చంద్రబాబు నాయుడు, ఆయన బృందం చేస్తున్న విమర్శలపై ఎక్కడైనా చర్చకు సిద్ధమేనని అన్నారు. బహిరంగ చర్చతో వాళ్ల నోళ్లు మూయించేందుకు తాము సిద్ధంగా ఉన్నామన్నారు. తమ పార్టీ నేత చిరంజీవిపై నోటికొచ్చినట్లు మాట్లాడితే సహించేది లేదని ఆయన వర్గం శాసనసభ్యుడు అనీల్ హెచ్చరించారు. వారిది నోరా లేక తాటిమట్టా అని అన్నారు.

Published On February 16, 2012