మోపిదేవి వెంకటరమణ జేబులో రాజీనామా లేఖ

By Pratap

Published: Wednesday, February 22, 2012, 11:12 [IST]

హైదరాబాద్: మద్యం సిండికేట్ల వ్యవహారంలో పదే పదే తన పేరు వస్తుండడంపై ఆబ్కారీ మంత్రి మోపిదేవి వెంకటరమణ ఆగ్రహంగా ఉన్నట్లు తెలుస్తోంది. తనపై వస్తున్న ఆరోపణలపై ముఖ్యమంత్రి మౌనంగా ఉండడంపై ఆయన తీవ్ర మనస్తాపానికి గురైనట్లు తెలుస్తోంది. మంగళవారం సాయంత్రం ముఖ్యమంత్రిని కలిసిన ఆయన తీవ్రమైన ఆగ్రహంతోనే మాట్లాడినట్లు చెబుతున్నారు. విచారణ జరపాలని కోరితే ఏమీ కాదులే అని సర్దిచెప్పారంటూ, అయినా తన పేరు మళ్లీ ముందుకు వచ్చిందని ఆయన అన్నట్లు తెలిసింది. రాజీనామా లేఖను ఆయన జేబులో పెట్టుకునే ముఖ్యమంత్రి వద్దకు వెళ్లినట్లు తెలుస్తోంది.

మోపిదేవి వెంకటరమణ ఆగ్రహించినా ముఖ్యమంత్రిగా నింపాదిగా మాట్లాడినట్లు తెలుస్తోంది. కూల్‌గా ఉండు, ఏమీ కాదులే అని సర్దిచెప్పినట్లు సమాచారం. శాసనసభలో ఆరోపణలపై మాట్లాడాలని, తాను కూడా మాట్లాడుతానని, ఏమీ కాదని ముఖ్యమంత్రి కిరణ్ కుమార్ రెడ్డి మోపిదేవితో అన్నట్లు సమాచారం.

తాను తీవ్ర మనస్తాపానికి గురవుతున్నానని, విచారణ త్వరగా జరిపించి దీనికి పుల్‌స్టాఫ్ పెట్టాలని సీఎంను కోరానని ఆయన మీడియా ప్రతినిధులతో చెప్పారు. దీనిపై ఏ విచారణకైనా సిద్ధమేనని, ఐదు నిమిషాల్లో రాజీనామా చేస్తానని, లేఖ నా జేబులోనే ఉందని, బలహీనవర్గాలకు చెందిన వ్యక్తిని అయినందునే తన పేరు బయటకు వస్తోందన్న ప్రచారం కూడా జరుగుతోందని ఆయన అన్నారు. తనకు సంబంధం లేదని చెప్పినా ఏసీబీ వివరణ కోరడం లేదని, మానసికంగా ఇబ్బంది పెడుతోందని, తననకు డబ్బులిచ్చారన్న ఇద్దరు వ్యక్తులపై విచారణ జరిపిస్తానని సీఎం హామీ ఇచ్చారని ఆయన చెప్పారు.

Published On February 22, 2012