తెలంగాణ సున్నితమైనది, అందుకే చేర్చలేదు: సిఎం

By Srinivas

Published: Thursday, February 23, 2012, 16:07 [IST]

హైదరాబాద్: తెలంగాణ చాలా సున్నితమైన అంశమని అందుకే గవర్నర్ ప్రసంగంలో ఆ అంశం చేర్చలేదని ముఖ్యమంత్రి కిరణ్ కుమార్ రెడ్డి గురువారం శాసనసభలో చెప్పారు. తెలంగాణ ఉద్యమాన్ని తాము ఎప్పుడూ కించపర్చలేదని చెప్పారు. సభలో ఆయన తెలుగుదేశం పార్టీ అధినేత నారా చంద్రబాబు నాయుడుపై విరుచుకు పడ్డారు. రైతుల ఆత్మస్థైర్యాన్ని దెబ్బతీయవద్దని ముఖ్యమంత్రి కిరణ్‌ కుమార్‌ రెడ్డి పేర్కొన్నారు. రాష్ట్ర ప్రజలు తెలివైనవారు కాబట్టే తెలుగుదేశం పార్టీని ప్రతిపక్షంలో కూర్చోబెట్టారని ఆయన అన్నారు. 95 లక్షల మందికి ఉపయోపడే విధంగా మేము విధానాలు రూపొందిస్తున్నామని, సమర్ధవంతమైన పాలన ప్రజలముందుకు తీసుకురావడానికి కృషి చేస్తున్నామని కిరణ్ తెలిపారు. రాష్ట్రంలో గోదాంలు లేవని ప్రతిపక్షాలు ఆరోపిస్తున్నాయని, గోదాములు నిర్మించలేదని వ్యాఖ్యానిస్తున్నాయని కానీ వాస్తవమేమిటంటే వ్యవసాయ ఉత్పత్తి బాగా పెరిగిందని, అందుకే గోదాములు సరిపోవడంలేదని ముఖ్యమంత్రి పేర్కొన్నారు. కొత్త గోదాముల నిర్మాణం ఆవశ్యకతనుగుర్తించామని, ఆ దిశగా నిర్మాణాలు అమలు చేయబోతున్నామని ఆయన చెప్పారు.

టిడిపి అధ్యక్షుడు చంద్రబాబు నాయుడు ఎప్పుడు రైతు ప్రతినిధిగా చెప్పుకోలేదన్నారు. ఆయన ముఖ్యమంత్రిగా ఉన్నప్పుడు ఈ రాష్ట్రానికి తనను తాను సిఈవోగా మాత్రమే చెప్పుకున్నారు. తెలుగుదేశం పార్టీ హయాంలో రైతులకు నష్టం జరిగింది తప్ప లాభం జరగలేదు. ఆ నష్టాన్ని ఇన్ని సంవత్సరాలైనా కూర్చడం సాధ్యం కావడం లేదని కిరణ్ మండిపడ్డారు. ఉచిత విద్యుత్‌కు బాబు ఎన్నేళ్ల తర్వాత మద్దతిస్తున్నారని అడిగారు. ఇన్నేళ్ల తర్వాత ఆయనకు ఉచిత విద్యుత్ గుర్తుకొస్తుందన్నారు. తెలుగుదేశం పార్టీ హయాంలో రైతులు చాలా నష్టపోయారన్నారు. ప్రతిపక్షం రైతులపై కపట ప్రేమ ప్రదర్శిస్తూ మొసలి కన్నీరు కారుస్తోందన్నారు. రైతులకు మద్దతు ధర ఇచ్చేందుకు కేంద్రంపై ఒత్తిడి తెస్తున్నామన్నారు. చంద్రబాబు ప్రతి అంశాన్ని రాజకీయం చేసేందుకు ప్రయత్నిస్తున్నారన్నారు.

Published On February 23, 2012