నో కామెంట్!: చంద్రబాబు, హరికృష్ణ సఖ్యతపై దగ్గుపాటి

By Srinivas

Published: Friday, February 24, 2012, 10:19 [IST]

హైదరాబాద్: ఏఐసిసి ప్రధాన కార్యదర్శి రాహుల్ గాంధీకి ఇప్పిడిప్పుడే ప్రధాని కావాలన్న ప్రగాఢ కాంక్ష ఏమీ లేదని మాజీ మంత్రి దగ్గుబాటి వెంకటేశ్వరరావు గురువారం అన్నారు. అసెంబ్లీ లాబీల్లో ఆయన విలేఖరులతో ముచ్చటించారు. తమవంటి నేతలు రాహుల్ గాంధీని ప్రధానిగా చూడాలని కోరుకుంటున్నామని.. అదే డిమాండ్‌ను వెల్లడిస్తున్నామని చెప్పారు. అయితే, రాహుల్ మాత్రం తక్షణమే ప్రధాని కావాలని తాపత్రయపడటం లేదని చెప్పారు. మరింతగా రాజకీయానుభవం పొందాలన్న యోచనలో ఆయన ఉన్నారని అన్నారు. ఉత్తరప్రదేశ్‌లో పార్టీని బలోపేతం చేయాలన్న తపన ఆయనలో స్పష్టంగా కన్పిస్తోందని చెప్పారు.

జాతీయస్థాయిలో కాంగ్రెస్ పటిష్ఠంగా ఉందన్నారు. కాంగ్రెస్ ప్రత్యర్థిపక్షం భారతీయ జనతా పార్టీ జాతీయ స్థాయిలో కన్పిస్తున్నా పూర్తిస్థాయిలో కాంగ్రెస్‌కు పోటీ ఇచ్చే పరిస్థితి లేదన్నారు. కాగా, రాష్ట్ర రాజకీయాలపై స్పందించేందుకు దగ్గుబాటి ఆసక్తి చూపలేదు. రాష్ట్ర రాజకీయాలపై తాను వ్యాఖ్యానించడం సరికాదన్నారు. ఇదే సమయంలో రాజ్యసభ సభ్యుడు హరికృష్ణ, ఆయన తనయుడు జూనియర్ ఎన్టీఆర్‌లు చంద్రబాబుతో సఖ్యతతో ఉంటున్నారా అనే విషయంపైనా ఆయన స్పందించలేదు. ఎవరు నమ్మినా నమ్మకున్నా విచిత్రంగా అన్పించినా ఇది నిజమని అన్నారు. వివిధ దేశాల్లోని పాలనా విధానంపై ఒక పుస్తకాన్ని రాస్తున్నానని ఈ సందర్భంగా దగ్గుబాటి తెలిపారు

Published On February 24, 2012