గద్దెనెక్కి వైయస్‌పై కుట్ర, బాబుతో కుమ్మక్కు: జగన్

గుంటూరు: వైయస్ రాజశేఖర రెడ్డి రెక్కల కష్టం మీద రెండు సార్లు అధికారంలోకి వచ్చిన కాంగ్రెసు నాయకులు తెలుగుదేశం పార్టీ అధ్యక్షుడు నారా చంద్రబాబు నాయుడితో కుమ్మక్కయ్యారని, వైయస్ రాజశేఖర రెడ్డిని అప్రతిష్టపాలు చేయడానికి ప్రయత్నిస్తున్నారని వైయస్సార్ కాంగ్రెసు పార్టీ అధ్యక్షుడు వైయస్ జగన్ వ్యాఖ్యానించారు. గుంటూరు జిల్లా ఓదార్పు యాత్రలో ఆయన సోమవారం సాయంత్రం ప్రసంగించారు. కాంగ్రెసు అధ్యక్షురాలు ఢిల్లీ గద్దె మీద కూర్చుని చక్రం తిప్పడానికి సహాయ పడింది వైయస్ రాజశేఖర రెడ్డేనని ఆయన అన్నారు.

వైయస్ రాజశేఖర రెడ్డిపై బురజ చల్లడానికి కాంగ్రెసు నాయకులు నైతిక విలువలను పక్కన పెట్టి చంద్రబాబుతో కుమ్మక్కయి రాజకీయాలు చేస్తున్నారని, అధికారాన్ని దుర్వినియోగం చేస్తున్నారని ఆయన విమర్శించారు. మరణించిన వైయస్ రాజశేఖర రెడ్డికి ఒక న్యాయం, బతికి ఉన్న చంద్రబాబుకు మరో న్యాయం అమలు చేస్తున్నారని ఆయన అన్నారు.

కాంగ్రెసు ప్రభుత్వానికి ప్రజలు, ప్రజా సమస్యలు పట్టడం లేదని ఆయన అన్నారు. వ్యవసాయం చేయడం కన్నా ఉరేసుకోవడం మేలని రైతన్న భావిస్తున్నాడని, అయినా ప్రభుత్వం పట్టించుకోవడం లేదని ఆయన అన్నారు. రాష్ట్రంలో దారుణమైన పరిస్థితులు ఉన్నాయని ఆయన అన్నారు.

English summary

YSR Congress president YS Jagan alleged that Congress leaders are hatching conspiracy against YSR.