గ్రేటర్‌లో మరో చిచ్చు: సర్వేను టార్గెట్ చేసిన రాజిరెడ్డి

హైదరాబాద్: మంత్రి ముఖేష్ గౌడ్, పార్లమెంటు సభ్యుడు అంజన్ కుమార్ మధ్య అఘాతం చల్లారక ముందే గ్రేటర్ కాంగ్రెసు పార్టీలో మరో చిచ్చు రాజుకుంది. మల్కాజిగిరి పార్లమెంటు సభ్యుడు సర్వే సత్యనారాయణను ఎల్ బి నగర్ శాసనసభ్యుడు బండారు రాజి రెడ్డి బుధవారం టార్గెట్ చేశారు. వచ్చే ఎన్నికల్లో తాను సర్వే సత్యనారాయణకు మద్దతు ఇచ్చే ప్రసక్తే లేదని తేల్చి చెప్పారు. సర్వేకు పార్టీ అధిష్టానం టిక్కెట్ కేటాయించినప్పటికీ తాను మాత్రం ఆయనకు అండగా నిలబడనని స్పష్టం చేశారు. 2014 ఎన్నికలకు ఏడాది ముందుగానే తాము మల్కాజిగిరి పార్లమెంటు అభ్యర్థిని ప్రకటించి రంగంలోకి దింపుతామన్నారు. మల్కాజిగిరి అభివృద్ధికి సర్వే సత్యనారాయణ చేసింది ఏమీ లేదని మండిపడ్డారు.

కాగా మంత్రి ముఖేష్ గౌడ్ మంగళవారం తాను వచ్చే ఎన్నికల్లో సికింద్రాబాద్ పార్లమెంటు స్థానం నుండి పోటీ చేస్తానని చెప్పిన విషయం తెలిసిందే. అంజన్ ముషీరాబాద్ నియోజకవర్గం నుండి పోటీ చేస్తారని చెప్పారు. దీనిపై అంజన్ తీవ్రంగా స్పందించారు. ఎవరు పోటీ చేయాలనే అంశం అధిష్టానం నిర్ణయిస్తుందని తనపై స్థానంపై కన్నేస్తే ఖబర్దార్ అన్నారు. దానికి ముఖేష్ బుధవారం తీవ్రంగానే స్పందించారు. సికింద్రాబాద్ అంజన్ జాగీరు కాదని అది ప్రజల జాగీరు అన్నారు. మరోవైపు అధిష్టానం తనకు ఎంపీ సీటు ఇస్తే పోటీ చేసేందుకు సిద్ధమని మరో ఎమ్మెల్యే కూన శ్రీశైలం గౌడ్ అన్నారు.

English summary

MLA Bandaru Raji Reddy targetted MP Sarve Satyanarayana today.