నాగర్‌కర్నూలు ఇండిపెండెంట్ అభ్యర్థి కిడ్నాప్, ఆందోళన

By Pratap

Published: Saturday, March 3, 2012, 14:49 [IST]

మహబూబ్‌నగర్ : మహబూబ్‌నగర్ జిల్లా నాగర్‌కర్నూలు శాసనసభా నియోజకవర్గం ఇండిపెండెంట్ అభ్యర్థి ఎద్దుల జనార్దన్ రెడ్డి అపహరణకు గురయ్యారు. నామినేషన్‌ను ఉపసంహరించుకోవడానికి ఆర్డీవో కార్యాలయానికి వెళ్తుండగా నలుగురు వ్యక్తులు వచ్చి ఆయనను కిడ్నాప్ చేసినట్లు తెలుస్తోంది. దీంతో తెలంగాణవాదంపై పోటీ చేస్తున్న తెలంగాణ నగారా సమితి నాయకుడు నాగం జనార్దన్ రెడ్డి వర్గీయులు ఆందోళనకు దిగారు. కాంగ్రెసువారే ఎద్దుల జనార్దన్ రెడ్డిని కిడ్నాప్ చేశారని వారు ఆరోపిస్తున్నారు.

తెలిసిన వివరాల ప్రకారం - నామినేషన్‌ను ఉపసంహరించుకోవడానికి ఆర్డీవో కార్యాలయానికి వెళ్తుండగా నలుగురు వ్యక్తులు కారులో వచ్చి ఎద్దుల జనార్దన్ రెడ్డితో మాట్లాడారు. వారే ఎద్దుల జనార్దన్ రెడ్డిని కిడ్నాప్ చేసి ఉంటారని అనుమానిస్తున్నారు. తెలంగాణపై చంద్రబాబు నాయుడి వైఖరిని నిరసిస్తూ తెలుగుదేశం పార్టీకి, శానససభా సభ్యత్వానికి నాగం జనార్దన్ రెడ్డి రాజీనామా చేయడంతో నాగర్‌కర్నూలు సీటుకు ఉప ఎన్నిక జరుగుతోంది. నాగం జనార్దన్ రెడ్డికి తెలంగాణ రాష్ట్ర సమితి (తెరాస) మద్దతిస్తోంది. కాంగ్రెసు అభ్యర్థిగా దామోదర్ రెడ్డి, తెలుగుదేశం అభ్యర్థిగా మర్రి జనార్దన్ రెడ్డి పోటీ చేస్తున్నారు.

Published On March 3, 2012