ప్రేమించట్లేదని చున్నీతో ప్రియురాలిని చంపిన ప్రియుడు

రాజమండ్రి: ప్రేమ నిరాకరించిందనే కారణంతో ఓ ప్రేమోన్మాది యువతి చున్నీతో గొంతు నులిమి హత్య చేసిన సంఘటన తూర్పు గోదావరి జిల్లాలో మంగళవారం జరిగింది. జిల్లాలోని పెనుమర్తిలో ఈ సంఘటన చోటు చేసుకుంది. తిమ్మాపురానికి చెందిన శ్రావణి దేవి ఇంటర్ సెకండియర్ చదవుతోంది. ఈమె వయస్సు పద్దెనిమిది. వెంకటేష్ అనే యువకుడు కూడా అదే కళాశాలలో చదవుతున్నాడు. అతని వయస్సు పంతొమ్మిది. శ్రావణి, వెంకటేష్ ల మధ్య ఏడాది క్రితం పరిచయం అయింది. అది ప్రేమగా మారింది. ఇటీవల వారిద్దరి మధ్య మనస్పర్ధలు చోటు చేసుకున్నాయి.

దీంతో శ్రావణి దేవి తన మనసు మార్చుకున్నట్లు వెంకటేష్ కు చెప్పింది. దీంతో అతను ఆగ్రహానికి గురయ్యాడు. మంగళవారం పరీక్షలు రాశాక మాట్లాడే పనుందని శ్రావణిని పెనుమర్తి పుంతలోకి తీసుకు వెళ్లాడు. అక్కడ వారిద్దరి మధ్య వాగ్వాదం జరిగింది. తనంటే ఇష్టం లేదని శ్రావణి దేవి తేల్చి చెప్పడంతో ఆవేశానికి లోనైన వెంకటేష్ ఆమె మెడలోని చున్నీని గట్టిగా బిగించి హత్య చేశాడు. అనంతరం తిమ్మాపురం పోలీసు స్టేషన్ కు వెళ్లి లొంగిపోయి ఈ విషయాలను వెల్లడించినట్లుగా తెలుస్తోంది. పోలీసులు కేసు నమోదు చేసుకొని దర్యాఫ్తు చేస్తున్నారు.

English summary

Intermediate student killed his lover in East Godavari on tuesday.