తెలంగాణపై ఆజాద్ దాటవేత, కెకెకు హామీ ఇవ్వలేదు

By Srinivas

Published: Wednesday, March 7, 2012, 14:18 [IST]

న్యూఢిల్లీ: తెలంగాణ అంశంపై కేంద్ర మంత్రి, ఆంధ్రప్రదేస్ రాష్ట్ర వ్యవహారాల ఇంచార్జ్ గులాం నబీ ఆజాద్ బుధవారం దాటవేత ధోరణి అవలంభించారు. కాంగ్రెసు పార్టీ ఆఫీస్ బేరర్ల సమావేశం అనంతరం ఆజాద్‌ను మీడియా తెలంగాణ, ఉత్తర ప్రదేశ్ ఎన్నికలపై ప్రశ్నించింది. తెలంగాణపై నిర్ణయమేమిటని మీడియా ప్రశ్నించింది. అయితే ఆయన దానిని దాటవేశారు. తెలంగాణపై చెప్పేదేముంది.. అక్కడ కాంగ్రెసు పార్టీ అభ్యర్థులను గెలిపించాలని ప్రజలను కోరతున్నానని అన్నారు. తెలంగాణ ప్రజలు తెలంగాణ ప్రాంతంలోని ఆరు నియోజకవర్గాలలో జరుగుతున్న ఉప ఎన్నికల్లో అక్కడి ప్రజలు కాంగ్రెసు పార్టీ అభ్యర్థులనే గెలిపించాలని ఆయన కోరారు. ఆంధ్ర ప్రదేశ్‌లో కాంగ్రెసు పార్టీయే అధికారంలో ఉందని, ఆ పార్టీ అభ్యర్థులకే ఓటు వేయాలని కోరారు. ఉత్తర ప్రదేశ్ ఎన్నికల ఫలితాల ప్రభావం ఆంధ్ర ప్రదేశ్ పైన పడదని ఆయన అభిప్రాయపడ్డారు. యుపిలో సంస్థాగత లోపాల వల్లే ఓడిపోయామని చెప్పారు. అక్కడ పార్టీ వ్యవస్థ పటిష్టంగా లేదన్నారు. రాజ్యసభ సభ్యుడు కె కేశవ రావుకు మరోసారి అవకాశం కల్పిస్తామని తాము చెప్పలేదని అన్నారు. రాజ్యసభ సీట్ల విషయంలో ఇప్పటి వరకు ఎలాంటి నిర్ణయం తీసుకోలేదన్నారు. ఎపిలో కాంగ్రెసు పార్టీ బలహీనపడిందనే వార్తల్లో నిజం లేదన్నారు.

కాగా ఉత్తర ప్రదేశ్ సాధారణ ఎన్నికలలో కాంగ్రెసు పార్టీ ఘోర పరాజయం పాలైన విషయం తెలిసిందే. ఉత్తర ప్రదేశ్, గోవా, పంజాబ్‌లలో ఘోర పరాజయం మూటకట్టుకున్న కాంగ్రెసు, మణిపూర్ ను తిరిగి నిలబెట్టుకుంది. ఉత్తరాఖండ్ లో ప్రభుత్వాన్ని ఏర్పాటు చేసేందుకు సిద్ధమవుతోంది. అయితే దేశ రాజకీయ స్థితిగతులను మార్చే ఉత్తర ప్రదేశ్ లో ఓటమిపై సమీక్ష జరుపుతోంది.

Published On March 7, 2012