జగన్ గాలి వీస్తోంది, 2014లో క్లీన్ స్వీప్: జూపూడి

By Srinivas

Published: Wednesday, March 7, 2012, 8:17 [IST]

హైదరాబాద్: ఉత్తర ప్రదేశ్ ఎన్నికల ఫలితాలతో జాతీయ పార్టీలను ప్రజలు తిరస్కరించినట్లు బోధపడిందని వైయస్సార్ కాంగ్రెసు పార్టీ నేత, శాసనమండలి సభ్యుడు జూపూడి ప్రభాకర రావు మంగళవారం అన్నారు. రాబోయే రోజుల్లో ఆంధ్రప్రదేశ్‌లోనూ తమ పార్టీ అధినేత వైయస్ జగన్మోహన్ రెడ్డి గాలి వీస్తుందన్నారు. హైదరాబాద్‌లోని పార్టీ కార్యాలయంలో ఆయన మీడియాతో మాట్లాడారు. తమ అధినేత జగన్మోహన్‌ రెడ్డిపై సిబిఐ విచారణ ఆపకపోతే, 2014 ఎన్నికల్లో వైఎస్సార్ కాంగ్రెస్ పార్టీ రాష్ట్రంలో 294 స్థానాలనూ క్లీన్ స్వీప్ చేసి అధికారంలోకి వస్తుందన్నారు.

ఈ ఐదు రాష్ట్రాల ఎన్నికల ఫలితాల ప్రభావం ఆంధ్రప్రదేశ్‌పై తప్పకుండా పడుతుందని ఆయన అన్నారు. శ్రీ పొట్టి శ్రీరాములు నెల్లూరు జిల్లా కోవూరుతో పాటు, రాబోయే 17 అసెంబ్లీ స్థానాల ఉప ఎన్నికలోనూ వైయస్సార్ కాంగ్రెస్ గెలుస్తుందన్నారు. ఉత్తర ప్రదేశ్‌లో ఎస్పీ అధికారంలోకి రావటం చూసి, టిడిపి చంకలు గుద్దుకోవడం అవివేకమన్నారు. అక్కడ అఖిలేష్ యాదవ్‌ను చూసి ఓట్లేశారు. ఇక్కడా చంద్రబాబును నమ్మరు కాబట్టి, ఆయన కొడుకు లోకేష్‌ కుమార్‌ను తిప్పగలిగితే ప్రజలకు కొత్తదనంగా ఉండి, టిడిపికి డిపాజిట్లు అయినా దక్కుతాయేమోనని జూపూడి ఎద్దేవా చేశారు.

Published On March 7, 2012