ప్రజారాజ్యం ఖతం, చిరు సహా కాంగ్రెసు ఎమ్మెల్యేలే

By Pratap

Published: Wednesday, March 7, 2012, 15:21 [IST]

హైదరాబాద్: రాష్ట్రంలో అట్టహాసంగా ముందుకు వచ్చిన మెగాస్టార్ చిరంజీవి ప్రజారాజ్యం కథ బుధవారం అధికారికంగా ముగిసింది. ప్రజారాజ్యం పార్టీ శానససభా పక్షం కూడా కాంగ్రెసు లెజిస్లేచర్ పార్టీ (సిఎల్పీ)లో అధికారికంగా విలీనమై పోయింది. విలీనం ప్రక్రియకు శాసనసభ స్పీకర్ నాదెండ్ల మనోహర్ ఆమోద ముద్ర వేశారు. దీంతో చిరంజీవి సహా ప్రజారాజ్యం పార్టీ శాసనసభ్యులంతా ఇక కాంగ్రెసు ఎమ్మెల్యేలే అవుతారు. కాంగ్రెసులో విలీనానికి ప్రజారాజ్యం పార్టీ చాలా రోజుల క్రితమే స్పీకర్‌కు లేఖ ఇచ్చింది. విలీనాన్ని ఆమోదిస్తూ సిఎల్పీ ఇటీవల తీర్మానం చేసిన స్పీకర్‌కు పంపించింది.

ప్రజారాజ్యం పార్టీ శాసనసభ్యుల విలీనంతో శాసనసభలో కాంగ్రెసు బలం 154కు పెరిగింది. నిజానికి, చిరంజీవిని రాజ్యసభకు నామినేట్ చేసిన తర్వాత విలీనం ప్రక్రియను పూర్తి చేయాలని అనుకున్నారు. కానీ, తాజా పరిణామాల నేపథ్యంలో ఆ ప్రక్రియను దానికి ముందే పూర్తి చేశారు. ఇక నుంచి ప్రజారాజ్యం పార్టీ శాసనసభ్యులు శానససభలో కాంగ్రెసు శానససభ్యులే అవుతారు.

Published On March 7, 2012