స్పీకర్‌పై అవిశ్వాసం పెట్టే యోచనలో చంద్రబాబు

By Srinivas

Published: Wednesday, March 7, 2012, 15:54 [IST]

హైదరాబాద్: స్పీకర్ నాదెండ్ల మనోహర్ పై తెలుగుదేశం పార్టీ అవిశ్వాస తీర్మానం ప్రవేశ పెట్టే యోచనలో ఉందని తెలుస్తోంది. బుధవారం టిడిఎల్పీ కార్యాలయంలో టిడిపి అధినేత నారా చంద్రబాబు నాయుడు పార్టీ ఎమ్మెల్యేలతో భేటీ అయ్యారు. ఈ సందర్భంగా బాబుతో సహా ఎమ్మెల్యేలు అసెంబ్లీలో స్పీకర్ నాదెండ్ల మనోహర్ తీరుపై అసంతృప్తి వ్యక్తం చేశారు. స్పీకర్ తీరు అసెంబ్లీలో సరిగా లేదనందున అవిశ్వాసం పెట్టాలని ఎమ్మెల్యేలు బాబును కోరారు. అయితే ప్రజాస్వామ్యయుతంగా అవసరమైన పక్షంలో దానికి కూడా సిద్ధమని బాబు వారితో చెప్పినట్లుగా తెలుస్తోంది. సభ జరిగే తీరు బాగా లేదని బాబు అసంతృప్తి వ్యక్తం చేశారు. కాగా సభలో అవినీతి విషయంలో ముఖ్యమంత్రి కిరణ్ కుమార్ రెడ్డిని, దివంగత ముఖ్యమంత్రి వైయస్ రాజశేఖర రెడ్డి హయాంలో వివాదాస్పదమైన వాటిని ఆమోదించిన మంత్రులు కన్నా లక్ష్మీ నారాయణ, ధర్మాన ప్రసాద రావు, బొత్స సత్యనారాయణ, వట్టి వసంత్ కుమార్, సబితా ఇంద్రా రెడ్డి, రఘువీరా రెడ్డి, మోపిదేవి వెంకట రమణ తదితరులను టార్గెట్ చేసుకోవాలని నిర్ణయించుకున్నట్లుగా తెలుస్తోంది.

విద్యుత్ పై చర్చ పూర్తి కాకుండానే సభను వాయిదా వేయడంపై బాబు మండిపడ్డారు. స్పీకర్ తీరుతో తాము విసిగి పోయామని, అవిశ్వాసం పెట్టడం మినహా తమ ముందు మరో అవకాశం లేదని చంద్రబాబు అన్నట్లుగా తెలుస్తోంది. మీడియా సమావేశంలో ఆయన మాట్లాడుతూ ప్రజాస్వామ్యయుతంగా చేయాల్సిందంతా చేస్తామని ప్రకటించారు. ప్రభుత్వం తీరు దున్నపోతుపై వర్షం పడినట్లుగా ఉందని ఎద్దేవా చేశారు. అవినీతి విషయంలో సర్కారుది రికార్డ్ అన్నారు. ముఖ్యమంత్రిది బాధ్యతారాహిత్యమన్నారు. ఎన్నివిధాలుగా చెప్పినా ప్రభుత్వం తీరు మార్చుకోవడం లేదన్నారు. స్పీకర్ తీరు అధికార పక్షానికి కొమ్ము కాసే విధంగా ఉందన్నారు. స్పీకర్ పై అవిశ్వాసం పెట్టే విషయం ఆలోచిస్తున్నట్లు చెప్పారు. ఐదు రాష్ట్రాలలో అసమర్థులను ప్రజలు తిప్పి కొట్టారన్నారు. జాతీయ స్థాయిలో మూడో ఫ్రంట్ ఏర్పడుతుందన్నారు. అది ఏ సమయంలోనైనా ఏర్పడవచ్చునని అన్నారు. ప్రాంతీయ పార్టీల ప్రాధాన్యత పెరుగుతోందన్నారు. మోత్కుపల్లికి వస్తున్న బెదిరింపు కాల్స్ పైన బాబు ముఖ్యమంత్రి, డిజిపికి లేఖ రాశారు.

Published On March 7, 2012