టిఆర్ఎస్ నేతల నుండి బెదిరింపు ఫోన్లు: మోత్కుపల్లి

By Srinivas

Published: Wednesday, March 7, 2012, 12:44 [IST]

హైదరాబాద్: తెలంగాణ రాష్ట్ర సమితి పార్టీ నేతలు తనకు ఫోన్ చేసి బెదిరిస్తున్నారని, తాను ఎవ్వరికీ భయపడే ప్రసక్తి లేదని తెలుగుదేశం పార్టీ నేత మోత్కుపల్లి నర్సింహులు బుధవారం అన్నారు. తెరాస అధినేత, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు వైఖరిని వ్యతిరేకిస్తూ మోత్కుపల్లి రెండో రోజు పాదయాత్ర నిర్వహించారు. మొదటి రోజు ఇంటి వద్ద నుండి అసెంబ్లీకి పాదయాత్ర చేపట్టిన మోత్కుపల్లి రెండో రోజు ఎన్టీఆర్ ఘాట్ నుండి గన్ పార్కు వరకు చేపట్టారు. ఈ సందర్భంగా ఆయన మీడియాతో మాట్లాడారు. కెసిఆర్ ఏ ఎండకు ఆ గొడుగు పట్టే అవకాశవాది అని ధ్వజమెత్తారు. కెసిఆర్ పార్టీ పెట్టి పదకొండు ఏళ్లు అయిన సందర్భంగా ఆయన తెలంగాణ ప్రజలను ఏవిధంగా మోసం చేశారో వివరించేందుకే తాను పాదయాత్ర చేపట్టానన్నారు. కెసిఆర్ మోసాలను బయటపెడుతున్న తనపై భౌతిక దాడులు చేస్తామంటూ హెచ్చరిస్తున్నారని, తాను భయపడే ప్రసక్తి లేదన్నారు.

ఆంధ్ర ప్రాంతానికి చెందిన కెసిఆర్ సమైక్యవాది అని ప్రజలకు చెప్పడమే తన యాత్ర ఉద్దేశ్యమన్నారు. తెరాస, కెసిఆర్ నుండి తెలంగాణను కాపాడుకోవాల్సిన ఆవశ్యకత ఉందన్నారు. తెలుగుదేశం పార్టీ అధికారంలోకి వస్తే తెలంగాణ అమరవీరుల కుటుంబాలలో ఒకరికి ఉద్యోగం ఇస్తామని హామీ ఇచ్చారు. గన్ పార్క్ వద్ద టిడిపి కార్యకర్తలు లోపలకు రాకుండా పోలీసులు అడ్డుకున్నారు. దీంతో అక్కడ ఇరువురి మధ్య కొద్దిసేపు వాగ్వాదం చోటు చేసుకుంది.

Published On March 7, 2012