రాహుల్ గాంధీ గ్రౌండ్ రియాల్టీ తెలుసుకున్నారు: విహెచ్

హైదరాబాద్: తమ పార్టీ నేత రాహుల్ గాంధీ గ్రౌండ్ రియాల్టీ తెలుసుకున్నారని కాంగ్రెసు సీనియర్ నేత వి. హనుమంతరావు అన్నారు. ఉత్తరప్రదేశ్ శానససభ ఎన్నికల ఫలితాలపై ఆయన బుధవారం ఆ విధంగా వ్యాఖ్యానించారు. యువనేతలు అనుభవాలతోనే రాటు దేలుతారని ఆయన అన్నారు. ఉత్తరప్రదేశ్ ఎన్నికల్లో ఓటమికి బాధ్యత వహించినందుకు ఆయన రాహుల్ గాంధీని అభినందించారు. దేశ భావి ప్రధాని రాహుల్ గాంధీయేనని ఆయన అన్నారు. రాహుల్ గాంధీ పార్టీని బలోపేతం చేస్తారని ఆయన అన్నారు. ఐదు రాష్ట్రాల ఎన్నికల ఫలితాల ప్రభావం యుపిఎపై పడబోదని ఆయన అన్నారు.

ఉప ఎన్నికలపై ముఖ్యమంత్రి కిరణ్ కుమార్ రెడ్డి, పిసిసి అధ్యక్షుడు బొత్స సత్యనారాయణ మాట్లాడుకుంటే సరిపోదని, పార్టీ సీనియర్ నాయకులను భాగస్వాములను చేయాలని ఆయన అన్నారు. వైయస్సార్ కాంగ్రెసు అభ్యర్థులను ఓడించడానికి అభ్యర్థుల ఎంపిక కసరత్తు ఇప్పటి నుంచే ప్రారంభం కావాలని ఆయన సూచించారు. పిలిచినా, పిలువకపోయినా తాను ఉప ఎన్నికల ప్రచారానికి వెళ్తానని ఆయన అన్నారు. ఉప ఎన్నికల్లో అవినీతికి వ్యతిరేకంగా ప్రజలు ఓటేస్తారని తాను భావిస్తున్నట్లు ఆయన తెలిపారు. తెలంగాణ జిల్లాల్లో ప్రచారానికి తాను వెళ్తానని ఆయన చెప్పారు. తెలంగాణ తెచ్చే సత్తా తమకు మాత్రమే ఉందని ఆయన అన్నారు.

English summary

Congress senior leader V Hanumanth Rao said that Rahul Gandhi has understood ground realities.