యడ్యూరప్పకు ఊరట: అక్రమ మైనింగ్ కేసు కొట్టివేత

బెంగళూరు: కర్ణాటక మాజీ ముఖ్యమంత్రి యడ్యూరప్పకు ఊరట లభించింది. లోకాయుక్త నివేదిక ఆధారంగా అక్రమ మైనింగ్ కేసులో ఆయనపై దాఖలు చేసిన ఎఫ్ఐఆర్‌ను కర్ణాటక హైకోర్టు బుధవారం కొట్టేసింది. ఈ లోకాయుక్త నివేదిక వల్లనే యడ్యూరప్ప ముఖ్యమంత్రి పదవికి రాజీనామా చేయాల్సి వచ్చింది. లోకాయుక్త పోలీసులు నమోదు చేసిన ఎఫ్ఐఆర్‌ను, తనపై క్రిమినల్ ప్రొసిడింగ్స్‌కు గవర్నర్ హెచ్ఆర్ భరద్వాజ్ జారీ చేసిన ఆదేశాలను యడ్యూరప్ప హైకోర్టులో సవాల్ చేశారు. యడ్యూరప్ప దరఖాస్తును అనుమతిస్తూ న్యాయమూర్తులు గోవిందరాజు, భక్తవత్సలతో కూడిన హైకోర్టు బెంచ్ ఆదేశాలు జారీ చేసింది.

తన వాదనను వినిపించే అవకాశం కల్పించకుండా ప్రోసీడింగ్స్‌ను ప్రారంభించారని యడ్యూరప్ప తెలిపిన అభ్యంతరాన్ని హైకోర్టు సమర్థించింది. హైకోర్టు తాజా ఆదేశాలతో యడ్యూరప్ప నైతికంగా బలపడినట్లయింది. అప్పటి లోకాయుక్త సంతోష్ హెగ్డే అక్రమ మైనింగ్‌పై గత జూలై 27వ తేదీన నివేదిక సమర్పించారు. దాని ఆధారంగా యడ్యూరప్ప రాజీనామాకు బిజెపి కేంద్ర నాయకత్వం ఒత్తిడి తెచ్చింది. దీంతో ఆయన జూలై 31వ తేదీన రాజీనామా చేశారు.

యడ్యూరప్ప కుటుంబానికి చెందిన ప్రేరణ ట్రస్టుకు సౌత్ వెస్ట్ మైనింగ్ కంపెనీ 10 కోట్ల రూపాయల విరాళం ఇచ్చిందని, రాచెన్‌హళ్లిలో 1.02 ఎకరాల భూమి కొనుగోలుకు మైనింగ్ కంపెనీ 20 కోట్ల రూపాయలు చెల్లించిందని లోకాయుక్త ఆరోపించింది.

English summary

In a big relief to state BJP strongman BS Yeddyurappa, Karnataka high court on Wednesday quashed an FIR against him in an illegal mining case based on the Lokayukta report that had caused his exit as chief minister.