పంజాబ్‌లోనూ తనయుడే: పార్టీకి సుఖ్‌బీర్ కొత్త రూపు

By Srinivas

Published: Wednesday, March 7, 2012, 11:41 [IST]

చంఢీగడ్: 1972 నుండి ఏ పార్టీకి వరుసగా రెండోసారి అధికారాన్ని ఇవ్వని పంజాబ్ ప్రజలు ఈసారి చరిత్ర తిరగ రాశారు. అధికార అకాలిదళ్‌కు ఈ ఎన్నికల్లో ప్రజలు పట్టం కట్టారు. ముఖ్యమంత్రి ప్రకాశ్ సింగ్ బాదల్ సోదరుడి తనయుడు, పార్టీలో కీలక నేత అయిన మన్ ప్రీత్ సింగ్ వేరు కుంపటి పెట్టుకుని పార్టీ ఓట్లు చీల్చడంతో పాటు ప్రభుత్వ వ్యతిరేకతను కాదని అకాలీదళ్ ఈ ఎన్నికల్లో ఘన విజయం సాధించింది. అయితే ఉత్తర ప్రదేశ్‌లో ఎస్పీ విజయం వెనుక ఆ పార్టీ చీఫ్ ములాయం సింగ్ యాదవ్ తనయుడు అఖిలేష్ యాదవ్ ఉన్నట్లుగానే పంజాబ్‌లో సిఎం ప్రకాశ్ బాదల్ తనయుడు సుఖ్ బీర్ సింగ్ పార్టీ అధికారంలోకి తేవడంలో కీలక పాత్ర పోషించారు. నిజానికి అధికార పక్షంపై అవినీతి, బంధుప్రీతికి సంబంధించిన అనేక ఆరోపణలు ఉన్నాయి. మన్ ప్రీత్ వేరుకుంపటి పెట్టుకోవడంతో పార్టీ చీట్లు చీలిపోయాయి. దీంతో ఎగ్జిట్ పోల్ కూడా అకాలీదళ్ ఓడిపోతుందని తేల్చింది. కానీ అనూహ్యంగా ప్రభుత్వ వ్యతిరేకతను, చీలికను తట్టుకొని అకాలీదళ్ అధికారాన్ని నిలబెట్టుకుంది.

బాదల్ తనయుడు సుఖ్ బీర్ సింగ్ పార్టీ నాయకత్వం పార్టీకి కలిసి వచ్చింది. సుఖ్ బీర్ ప్రస్తుతం ఉప ముఖ్యమంత్రి. బాదల్‌కు వ్యక్తిగతంగా, భావోద్వేగపరంగానే కాక కుమారుడికి అధికార బదలాయింపు పరంగా ఇది చాలా కీలకం. 2008లో సుఖ్ బీర్‌కు బాదల్ పగ్గాలు అప్పజెప్పినప్పుటు మిత్రపక్షం బిజెపి కూడా ఆశ్చర్యపోయింది. సుఖ్ బీర్ బాధ్యతలు చేపట్టాక సంప్రదాయ, ఛాందస పార్టీగా ముద్ర ఉన్న పార్టీకి కొత్త రూపు తీసుకు వచ్చారు. ఎప్పటికప్పుడు కొత్త వ్యూహాలు పన్నుతూ.. పార్టీకి అనుకూల వాతావరణాన్ని సృష్టించారు. దీంతో వంశపాలన ముద్ర కొందమేర తొలగించారు. కేంద్రంపై ఉన్న వ్యతిరేకత ప్రభుత్వానికి అనుకూలించింది.

Published On March 7, 2012