గాలి ఆస్తుల గుట్టు విప్పుతున్న పిఎ అలీఖాన్

బెంగళూర్: అలీఖాన్ సిబిఐ విచారణలో కర్ణాటక మాజీ మంత్రి గాలి జనార్దన్ రెడ్డి అస్తుల గుట్టు విప్పుతున్నట్లు తెలుస్తోంది. ఇప్పటి వరకు లెక్క కట్టిన ఆస్తుల కన్నా ఎక్కువ ఆస్తులు గాలి జనార్దన్ రెడ్డి కూడగట్టినట్లు సిబిఐ గ్రహించిందని వార్తలు వస్తున్నాయి. అసోసియేటె్డ మైనింగ్ కంపెనీ (ఎఎంసి) అక్రమ మైనింగ్ కేసులో సిబిఐ గాలి జనార్దన్ రెడ్డిని, అలీఖాన్‌ను విచారిస్తోంది. అలీఖాన్‌తో తనకు ఏ విధమైన సంబంధం లేదని, తమ మధ్య ఏ విధమైన లావాదేవీలు జరగలేదని గాలి జనార్దన్ రెడ్డి సిబిఐ అధికారులతో బుధవారం చెప్పినట్లు సమాచారం. అయితే, సిబిఐ కంట పడని అనేక ఆస్తుల వివరాలను అలీఖాన్ వెల్లడించినట్లు చెబుతున్నారు.

అలీఖాన్ వెల్లడించిన సమాచారంతో గాలి జనార్దన్ రెడ్డి అదనపు ఆస్తుల గుర్తింపునకు సిబిఐ రాయచూరులో పర్యటించనున్నట్లు సమాచారం. బిజెపి కర్ణాటకలో అధికారం చేపట్టిన రెండేళ్లలో గాలి జనార్దన్ రెడ్డి ఆస్తులు వేయి రెట్లు పెరిగినట్లు ఒక అంచనా. ఇనుము, ఉక్కు, రవాణా సంస్థల నుంచి మామూళ్లుగా నెలకు వంద నుంచి 150 కోట్ల రూపాయల వరకు వచ్చేదని, ఈ సంస్థల నుంచి మామూళ్ల వసూలును అలీఖాన్ చూసుకునేవాడని, గనుల సంస్థల నుంచి వసూలయ్యే ఖనిజాన్ని ఓ శాసనసభ్యుడు చూసుకునేవాడని అంటారు. ఆయా సంస్థల నుంచి అక్రమంగా తవ్విన ఖనిజం పరిమాణంలో 30 శాతం వరకు మామూలుగా వసూలు చేసేవారని అంటున్నారు.

English summary

It is said that Alikhan has revealed about Gali janardhan Reddy's properties details in CBI enquiry.