పదవి ఇవ్వలేదని పార్టీ పెట్టాడు: కెసిఆర్‌పై చంద్రబాబు

మెదక్: పదవి ఇవ్వనందుకే మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు తెలంగాణ రాష్ట్ర సమితి పార్టీ పెట్టారని తెలుగుదేశం పార్టీ అధినేత నారా చంద్రబాబు నాయుడు ఆదివారం విమర్శించారు. ఆయన ఉప ఎన్నికల ప్రచారానికి వెళుతున్నారు. ఈ సందర్భంగా మెదక్ జిల్లాలో మీడియాతో మాట్లాడారు. పదవి ఇవ్వనందుకే కెసిఆర్ పార్టీ నుండి బయటకు వచ్చి తెరాస పెట్టారన్నారు. ఆయనకు పదవి ఇస్తే పార్టీ పెట్టే వారు కాదన్నారు. తెలంగాణకు వ్యతిరేకంగా తాను ఎప్పుడూ మాట్లాడలేదని అన్నారు. తెలంగాణకు టిడిపి వ్యతిరేకం అనే భావన ప్రజల్లో కలుగ చేయాలని చూస్తున్నారని, కానీ టిడిపి తెలంగాణకు వ్యతిరేకం కాదన్నారు. తెలంగాణ తమ చేతుల్లో లేదని కేంద్రం ఇస్తే తమకు ఎలాంటి అభ్యంతరం లేదన్నారు.

నోటు, వోటు, సీటుకే టిఆర్ఎస్ పరిమితం అయిందన్నారు. పార్టీతో ఎన్నికల్లో లబ్ధి పొందుతున్నారన్నారు. సెంటిమెంట్‌తో లబ్ధి పొందాలని చూసే వారికి ఉప ఎన్నికల్లో బుద్ధి చెప్పాలని పిలుపునిచ్చారు. కాగా చంద్రబాబు శనివారం మహబూబ్ నగర్ జిల్లాలో ప్రచారం చేసిన విషయం తెలిసిందే. రాష్ట్రంలో మద్యం ఏరులై పారుతున్న ప్రభుత్వం మాత్రం నిమ్మకు నీరెత్తినట్లుగా ఉందన్నారు. తెలుగుదేశం తెలంగాణ ఫోరం నేతలకు ప్రజల మనోభావాల మేరకు నడుచుకునేందుకు పూర్తి స్వేచ్ఛ ఉందన్నారు.

English summary

TDP chief Nara Chandrababu Naidu accused TRS chief K.Chandrasekhar Rao.