నాగ బాబు, జయదేవా: చిరంజీవి సీటు ఎవరి పరం?

By Srinivas

Published: Monday, March 12, 2012, 9:39 [IST]

చిత్తూరు: కాంగ్రెసు పార్టీ నేత చిరంజీవి స్థానంపై పలువురు నేతలు దృష్టి సారిస్తున్నట్లుగా కనిపిస్తోంది. చిరంజీవి ప్రస్తుతం తిరుపతి అసెంబ్లీ నియోజకవర్గం నుండి ఎమ్మెల్యేగా ప్రాతినిథ్యం వహిస్తున్నారు. అయితే ఆయనకు రాజ్యసభ సీటు దాదాపు ఖరారు కావడంతో తిరుపతిపై పలువురు దృష్టి పడింది. చిరంజీవి తిరుపతి స్థానాన్ని ఖాళీ చేస్తే అక్కడ అభ్యర్థిని ఖరారు చేసే అవకాశం కూడా అధిష్టానం చిరంజీవికే ఇచ్చిన పక్షంలో ఆయన తన సోదరుడు, ప్రముఖ నిర్మాత నాగబాబును రంగంలోకి దింపేందుకు సన్నద్దమవుతున్నారనే వాదనలు వినిపిస్తున్నాయి. నాగబాబు పోటీ చేస్తారనే అంశాన్ని ఇటీవల చిరంజీవి కొట్టి పారేశారు. అయితే అధిష్టానం చిరుకే ఛాయిస్ ఇస్తే మాత్రం ఆయన ఖచ్చితంగా నాగబాబుకే ఓటు వేస్తారని అంటున్నారు.

మరోవైపు జిల్లాకు చెందిన మంత్రి గల్లా అరుణ కుమారి తనయుడు గల్లా జయదేవ్ కూడా చిరంజీవి స్థానం పైనే కన్నేశారు. ఆయన మొదట శ్రీకాకుళం నుండి రంగంలోకి దిగాలని యోచించారట. అయితే అనుకోకుండా చిరంజీవి స్థానం ఖాళీ అవుతుండటంతో ఆయన తన దృష్టిని శ్రీకాకుళం నుండి తిరుపతి వైపు మరల్చారని అంటున్నారు. అరుణ కుమారి తన తనయుడు గురించి ఢిల్లీ అధిష్టానం పెద్దల చెవిలోనూ ఇప్పటికే వేశారట. మరి తిరుపతి సీటు ఎవరి పరం అవుతుందో చూడాలి.

Published On March 12, 2012