బెంగళూరు రైల్లో భాను కిరణ్?, టెక్కీ అని తేలిన వైనం!

By Srinivas

Published: Monday, March 19, 2012, 9:09 [IST]

కర్నూలు: మద్దెలచెర్వు సూరి హత్య కేసులో ప్రధాన నిందితుడు భాను కిరణ్ అరెస్టుపై ఆదివారం రాత్రి కర్నూలు జిల్లాలో కలకలం రేగింది. భాను కిరణ్‌ను పోలీసులు జిల్లాలో అరెస్టు చేసినట్లు వదంతులు వినిపించాయి. సూరి హత్య తర్వాత పరారీలో ఉన్న ఇతని కోసం సిఐడి పోలీసులు విస్తృతంగా గాలిస్తున్నారు. ప్రముఖ పుణ్యక్షేత్రమైన మంత్రాలయం సమీపంలో తుంగభద్ర రైల్వే స్టేషన్‌లో కుటుంబ సభ్యులతో కలిసి నాందెడ్ వెళుతున్న ఓ వ్యక్తి భాను కిరణ్‌ను పోలి ఉండటంతో ఆదోనీ ఎఎస్పీ, మంత్రాలయం సిఐ పట్టుకున్నారు. అతనిని మాధవరం పోలీసు స్టేషన్‌కు తీసుకు వెళ్లి విచారించారు. అతనిని అత్యంత గోప్యంగా పోలీసు స్టేషన్‌లోకి తీసుకు వెళ్లి అర్ధరాత్రి వరకు విచారించారు. అయితే పట్టుకున్న వ్యక్తి భాను కిరణ్ కాదని తమ ప్రాథమిక విచారణలో తేలిందని పోలీసులు ప్రకటించారు.

కాగా పోలీసులు పట్టుకున్న వ్యక్తి బెంగళూరుకు చెందిన సత్యనారాయణగా సిఐడి పోలీసులు గుర్తించారు. అతను తన భార్య, పిల్లలతో మంత్రాలయం రాఘవేంద్ర స్వామి వారిని దర్శించుకునేందుకు వచ్చారు. అతను బెంగళూరులో సాఫ్టువేర్ ఇంజనీర్‌గా పని చేస్తున్నట్లుగా సమాచారం. అయితే అతను దాదాపు భానుకిరణ్‌నే పూర్తిగా పోలినట్లు ఉన్నట్లు తెలుస్తోంది. పోలీసులు అతనిని ఇంకా మీడియాకు చూపించలేదు.

Published On March 19, 2012