ఈరోజూ అసెంబ్లీ వాయిదా, సిఎంకు టి-ఎమ్మెల్యేల బాసట

హైదరాబాద్: శాసనసభ ప్రారంభమైన ఐదు నిమిషాలకే బుధవారం మళ్లీ వాయిదా పడింది. సభ ప్రారంభం కాగానే స్పీకర్ నాదెండ్ల మనోహర్ విపక్షాల వాయిదా తీర్మానాలను తిరస్కరించారు. వాయిదా తీర్మానాలపై చర్చకు టిడిపి, టిఆర్ఎస్, బిజెపి పట్టుబట్టాయి. తెలంగాణలో పెరుగుతున్న ఆత్మహత్యలపై చర్చ చేపట్టాలంటూ విపక్ష సభ్యులు నినాదాలు చేశారు. దీనిపై స్పీకర్ స్పందిస్తూ తెలంగాణలో ఆత్మహత్యల నివారణకు సభ తరఫున విజ్ఞప్తి చేద్దామన్నారు. స్పీకర్ పోడియం వద్దకు విపక్ష సభ్యులు దూసుకు వెళ్లారు. దీంతో స్పీకర్ సభను పదిహేను నిమిషాలు వాయిదా వేశారు.

కాగా తెలంగాణ అంశంపై ముఖ్యమంత్రి కిరణ్ కుమార్ రెడ్డి పార్టీ అధిష్టానానికి ఎలాంటి తప్పుడు నివేదికలు ఇవ్వలేదని తెలంగాణ ప్రాంత కాంగ్రెసు పార్టీ ఎమ్మెల్యేలు బుధవారం అసెంబ్లీ మీడియా పాయింట్ వద్ద చెప్పారు. తాము ఉద్యమానికి దూరంగా లేమని చెప్పారు. తెలంగాణ రాని పక్షంలో తాము దేనికైనా సిద్ధమని ప్రకటించారు. ఈ అంశంపై అధిష్టానం చెప్పిన మాటల వల్లే తాము మౌనంగా ఉన్నామని చెప్పారు. తెలంగాణలో తెలంగాణవాదం లేదని ఎవరైనా చెప్పడం అది తప్పే అవుతుందన్నారు. తెలంగాణకు పరిష్కారం అసెంబ్లీలో లేదని మాత్రమే కిరణ్ కుమార్ రెడ్డి చెప్పారన్నారు. ఈ అంశం అధిష్టానం చేతిలో ఉందని మాత్రమే సిఎం చెప్పారన్నారు.

English summary

Telangana Congress leaders supported CM Kiran Kumar Reddy.